اطلاعات روز: د طالبانو وياند ذبيح الله مجاهد د پاکستان د لنډمهالي لومړي وزير انورالحق کاکړ خبرو ته چې په افغانستان کې د طالبانو تر واکمنېدو وروسته په دې هيواد کې د ناامنۍ د زياتېدو په اړه يې کړې وې، په ځواب کې ويلي چې دا ډله د پاکستان د امنيت ساتنې مسووليت نه لري.
ښاغلي مجاهد نن ماښام (چهارشنبه، ۱۷ د لړم) پر ايکس د يوې اعلاميې په خپرولو سره ويلي چې په افغانستان کې د طالبانو تر برياليتوب وروسته په پاکستان کې د ناامنۍ زياتېدل د دې دليل نه دی چې په دې هيواد کې د ناامنۍ تر شا د طالبانو لاس دی.
ده زياته کړې چې پاکستانيان بايد خپلې داخلې ستونزې په خپله حل کړي او پر طالبانو د خپلو ناکاميو پړه وانه چوي.
د طالبانو وياند ويلي، دا ډله لکه څرنګه چې په افغانستان کې سوله او ثبات غواړي، د پاکستان لپاره هم د امنيت غوښتونکې ده او چاته اجازه نه ورکوي چې د افغانستان خاوره د پاکستان پر ضد استفاده کړي.
د پاکستان لنډمهالي لومړي وزير انورالحق کاکړ نن په يوه خبري کانفرانس کې وويل چې په افغانستان کې د طالبانو تر برياليتوب وروسته په پاکستان کې تروريستي پېښې ۶۰ سلنه زياتې شوې دي.
د پاکستان لومړي وزير زياته کړې چې په دې دوو کلونو کې د افغانستان ۱۵ وګړي په ځانمرګو بريدونو کې ښکېل و او همدا راز له تروريزم سره په مبارزه کې د افغانستان ۶۴ وګړي وژل شوي دي.
ده ويلي چې هيواد يې تمه درلوده چې پر افغانستان د طالبانو تر واکمنېدو وروسته به د پاکستان ضد ډلو په ځانګړې توګه ټي ټي پي پر خلاف جدي اقدامات کېږي او د افغانستان له خاورې به د پاکستان پر ضد په مطلقه توګه استفاده نه کېږي.
پاکستاني چارواکو تر دې وړاندې هم ادعا کړې وه چې افغانان د دې هيواد په ناامنيو کې لاس لري؛ هغه ادعا چې د طالبانو له توند غبرګون سره مخ شوې ده.
