اطلاعات روز: د طالبانو د دفاع وزارت سرپرست وزیر يعقوب مجاهد له افغان کډوالوم سره د پاکستان چلند «بربريت» او «وحشت» بللی او د پاکستان له خلکو يې غوښتي چې د خپلو چارواکو مخه ونيسي.
نوموړي دا څرګندونې نن (پنج شنبه، ۱۳ د تلې) د طالبانو تر واک لاندې د پوليسو د اکاډمۍ د څوارلسمې دورې د فارغينو په مراسمو کې کړې دي.
مجاهد د افغانستان د کډوالو لپاره د پاکستان له لوري ټاکل شوې وروستۍ نېټه غندلې او ويلي يې دي چې دا پرېکړه غير عادلانه او بې انصافه ده.
هغه زياته کړې: «موږ د پاکستان له شريفو خلکو او محترمو سياسيونو او علماوو څخه هېله کوو چې چارواکې يې چې له افغانانو سره بربريت او وحشت کوي، مخه دې يې ونيسي.»
د طالبانو د دفاع وزارت سرپرست د بشري حقونو له بنسټونو او ملګرو ملتونو هم غوښتي چې د پاکستان مخه دې ونيسي.
ده ويلي: «موږ له نړيوالو بنسټونو او هغو هيوادونو چې خپل ځانونه د بشري حقونو مدافع ګڼي، هېله کوو او ملګري ملتونه او نور سازمانونه بايد ميدان ته راشي او د پاکستان لاس ونيسي چې دا عمل [ونه کړي]. له افغانانو سره دا عمل ظلم دی، وحشت او بربريت دی چې په هيڅ ډول نه شي توجيه کېدلای.»
په پاکستان کې افغان کډوال د نيونې او له هغه هيواده د شړلو له خطر سره مخ دي.
ويل کېږي چې په وروستيو ورځو کې پاکستاني پوليسو شاوخوا زر افغان وګړي نيولي دي.
پاکستاني دولت هم اعلان کړی چې «غير قانوني» پناه غوښتونکو او کډوالو ته د نوامبر تر لومړۍ نيټې وخت ورکوي چې دا هيواد پرېږدي او که ولاړ نه شي نو وروسته به د دې هيواد د پوليسو له لوري وشړل شي.
د بښنې د نړيوال سازمان په ګډون د بشري حقونو نړيوالو بنسټونو د پاکستان دې تصميم ته په غبرګون کې ويلي، چې افغانستان ته د کډوالو په زور شړل کډوال له جدي خطر سره مخ کوي.
د بښنې نړيوال سازمان له پاکستانه غوښتي چې د افغان کډوالو تاريخي ملاتړ ته دې دوام ورکړي تر څو هغوی د شړلو له وېري پرته د عزت ژوند وکړي.
