اطلاعات روز: نورستان کې ځايي سرچینې وایي، چې د «ملي مقاومت جبهې» ځواکونو د دې ولایت په منډول او دواب ولسوالیو کې پر طالبانو بریدونه کړي چې له امله یې اوو طالبانو ته مرګ ژوبله اوښتې.
یوه سرچینه د نوم نه ښودلو په شرط وایي، دا بریدونه تېره شپه (سې شنبه، ۱۱ د تلې) د منډول او دواب ولسوالیو په اړوندو سيمو کې شوي دي.
د سرچینې په خبره، د «ملي مقاومت جبهې» ځواکونو لومړی برید په منډول ولسوالۍ کې د طالبانو پر یوې بوستې برید کړی، چې له امله یې دوه طالبان مړه او دوه نور ټپیان شوي.
د سرچینې په وينا، د یاد برید له امله د طالبانو یو رېنجر موټر هم سوځېدلی.
یوې بلې سرچینې چې نه یې غوښتل نوم یې خپور شي ویلي، تېره شپه د «ملي مقاومت جبهې» ځواکونو د دواب ولسوالۍ پر ودانۍ راکټي برید کړی، چې په پایله کې یې درې طالب سرتېري ټپیان شوي.
سرچینو زیاته کړې، چې په دې بریدونو کې د «ملي مقاومت جبهې» یو شمېر ځواکونه هم ټپیان شوي؛ خو د شمېر په اړه یې څه نه دي ویلي.
بلخوا «ملي مقاومت جبهې» هم په یوه اعلاميه کې ويلي چې د نورستان په منډول او دواب ولسواليو کې يې پر طالبانو بريدونه کړي او دوه تنه يې وژلي او پنځه نور يې ژوبل کړي دي.
د «ملي مقاومت جبهې» له اعلاميې سره سم، د نورستان په منډول ولسوالۍ کې جګړه د سېشنبې شپې پر شپږ بجو پيل چې د چهارشنبې د ورځې د سهار تر څلورو بجو روانه وه. په اعلاميه کې ويل شوي چې د جګړې په ترڅ کې دوه طالبان وژل شوي او دوه نور ژوبل دي.
همدا راز «ملي مقاومت جبهې» د دواب ولسوالۍ پر مرکز د راکيټي بريد خبر هم ورکړی او ويلي يې دي چې درې طالبان يې ژوبل کړي. د دې جبهې له لوري له خپرې شوې اعلاميې سره سم، په دې بريدونو کې د «ملي مقاومت جبهې» يوازي يو سرتېری ژوبل سطحي ژوبل شوی.
تر اوسه په نورستان کې د طالبانو ځايي چارواکو د دې بریدونو په تړاو څه نه دې ویلي.
غربي نورستان د هېواد هغه سيمه ده چې د پخواني جمهوري نظام له پرځېدو وروسته پکې «ملي مقاومت جبهه» فعاله او وخت ناوخت د طالبانو پر نظامي مرکزونو او پوستو بریدونه کوي.
