اطلاعات روز: د امريکا د استازو مجلس د بهرنيو اړيکو د کميټې رييس مايکل مک کال ويلي، چې طالبانو هیڅکله له القاعدې سره خپلې اړيکې نه دې پرې کړي.
نوموړي دا څرګندونې د امريکا د استازو مجلس د بهرنيو اړيکو د کميټې په استماعيه ناسته کې کړې دي. د ده بیانیه پرون (دوشنبه، ۱۰ د تلې) د امريکا د استازو مجلس د بهرنيو اړيکو د کميټې پر ويبپاڼه خپره شوې ده.
مک کال زياته کړې، چې د بايډن د حکومت لوړپوړو چارواکو هڅه وکړه چې د طالبانو تروريستي اړيکې کم ارزښته وښيي تر څو دا ډله د سپټمبر د يوولسمې د بريدونو په تړاو د نظامي اقدام هدف ونه ګرځي.
د امريکا دې قانون جوړوونکي ويلي، چې د بايډن د حکومت چارواکو بيا-بيا ادعا کړې چې طالبان د دوحې د تړون له مخې له تروريزم سره د مبارزې لپاره پر خپلو ژمنو عمل کوي.
نوموړی ویلي: «په واقعيت کې طالبان له ۲۰۱۴ کال راهيسې په داخل کې د واک د ساتنې لپاره د خپل ګډ دښمن داعش خراسان د ماتولو لپاره له خپلو متحدينو [لکه] القاعدې سره يو ځای يو ځای کار کوي.»
مک کال ويلي، چې که طالبان واقعا د تروريزم ضد ژمنو ته پابند وي، القاعده به يې نه تمويلوله او نه به يې له دې ډلې استفاده کوله او نه به يې هم خوندي کول.
ده زياته کړې: «زه سخت اندېښمن يم چې د بايډن دولت هڅه کوي دا واقعيت د امريکا له خلکو پټ کړي، تر څو له طالبانو سره د اړيکو د عادي کولو په لړ کې دا ډله د نظامي ځواک د استفادې له مجوز (آی يو ايم ايف) څخه حذف کړي.»
د دې مجوز له مخې، امريکا کولای شي د هغو افرادو او سازمانونو پر خلاف چې د سپتمبر د يوولسمې په بريدونو کې لاس لري، له نظامي ځواک څخه استفاده وکړي.
طالبانو د دوحې په هوکړه لیک کې له امريکا سره ژمنه کړې چې له القاعدې سره اړيکې پرې کوي او غړو ته يې په افغانستان کې پناه نه ورکوي.
د تېرو دوو کلونو پرمهال طالبان بيا-بيا د دوحې د هوکړه لیک په نقض تورن شوي دي. دا تورونه د ۲۰۲۲ ميلادي کال په لومړيو کې هغه مهال چې امريکا اعلان وکړ په کابل کې يې د القاعدې شبکې مشر ايمن الظواهري وژلی دی، نور هم زيات شوي دي.
له دې سره-سره، د امريکا ولسمشر جوبايډن هم په خپلو څرګندونو کې وويل، چې القاعده په افغانستان کې ځپل شوې او طالبانو په دې مورد کې له امريکا سره مرسته کړې ده.
بايډن وويل: «په ياد ولرئ چې ما د افغانستان په اړه څه ويلي و؟ ما ويلي و چې القاعده به په افغانستان کې نه وي. ما ويلي و چې دوی به هلته نه وي. ما ويلي و چې طالبان به له موږ سره مرسته کوي. اوس څه روان دي؟ څه پېښېږي؟ ورځپاڼې ولولئ، رښتيا مې ويلي و.»
