اطلاعات روز: د خوړو د نړيوال پروګرام اجرايوي مديرې سينډي مک کين ويلي، دا پروګرام په افغانستان کې د اکتوبر مياشتې لپاره کافي بودیجه نه لري او که بودیجه تامین نه کړي، نو اړ دي چې افغانستان پرېږدي.
نوموړې د امريکا له ای بي سي خبري شبکې سره په خبرو کې ويلي، چې د خوړو نړيوال پروګرام په خپل ۶۰ کلن تاريخ کې د بودیجې تر ټولو بد مالي کمښت لاس او ګریوان دی.
اغلې مک کين زياته کړې: «موږ له ناهيلي کوونکي وضعيت سره مخ يو.»
د خوړو د نړيوال پروګرام اجرايوي مديرې ویلي، دا پروګرام د افغانستان، بنګله دېش، کانګو ډيموکراټيک جمهوريت، هايتي، اردن، فلسطين، سويلي سوډان، سوماليه او سوريه کې د پام وړ مرستو کمولو ته اړ شوي دي.
دې زياته کړې چې په افغانستان کې د خوړو نړيوال پروګرام « د اکتوبر مياشتې د تېرولو لپاره کافي پيسې نه لري.»
اغلې مک کين ويلي: «تر څو چې د افغانستان لپاره بودیجه پيدا نه کړو، تر هغو يې بايد په بشپړه توګه پرېږدو.»
د خوړو نړيوال پروګرام پر افغانستان د طالبانو تر واکمنۍ وروسته له اړمنو سره حياتي مرستې کړې دي.
د دې پروګرام مديرې ټينګار کړی چې د افغانستان لپاره د بودیجې پيدا کول بېړنۍ اړتيا ده او ويلي يې دي چې اوس مهال ښځې کار نه شي کولای او د خوړو نړيوال پروګرام له ښځو او ماشومانو سره مرسته کوي.
د دې په وينا، د خوړو د نړيوال پروګرام د وتلو پايله به لوږه او کاختي وي.
د خوړو نړيوال پروګرام وايي، چې په افغانستان کې د مرستې رسونې د عملياتو لپاره يو ميليون ډالرو بودیجې ته اړتيا لري.
