اطلاعات روز: د اروپا د پارلمان غړې هانا نيومن وايي چې له افغانستانه د زده کړو د برخې درې فعالان مطيع الله ويسا، مرضيه اميري او پرستو حکيم د ۲۰۲۳ کال «ساخاروف» جايزې ته نوماند شوي دي.
اغلې نيومن نن (پنجشنبه، ۲۳ د وږي) پر ايکس ټولنيزې شبکې ليکلي دي چې د زده کړو د برخې فعالانو پټ ښوونځي سازماندهي کړي، ليرې پرتو سيمو ته يې سفر کړی او له ليرې يې زده کړې مديريت کړې دي.
دې ليکلي چې د ښوونې او روزنې د برخې ډېری فعالان پر زده کړو د طالبانو د بريدونو په وړاندې مقاومت کوي.
د پارلمان دې غړې زياته کړې: «ما او د پارلمان ۵۰ نورو غړو پرېکړه وکړه چې له دوی (د زده کړو فعالان) څخه درې تنه د ۲۰۲۳ ساخاروف جايزې ته نوماند کړو.»
«ساخاروف» جايزه د ۱۹۹۸ پر مهال د بشري حقونو او ازاديو د مدافعو سازمانونو او افرادو د درناوي په موخه را منځ ته شوه.
دا جايزه د فزيکپوه او د پخواني شوروي اتحاد د سياسي مخالف آندري ساخاروف په وياړ نومول شوې او د بشري حقونو او فکري ازادۍ مدافعانو ته د اروپايي اتحاديې د پارلمان تر ټولو د ستر درناوي نښه ده.
د هانا نيومن په وينا، سږ کال له افغانستانه د «ساخاروف» نوماندان پرستو حکيم، مرضيه اميري او مطيع الله ويسا دي.
دې ويلي چې پرستو حکيم د پټو ښوونځيو بنسټګره ده او اوس مهال د «سارک» په نوم سازمان له بهره مديريت کوي.
همدا راز د نيومن په وينا، مرضيې اميري له افغانستانه تر تېښتي وروسته پټ ښوونځي او انلاين دورې اداره کوي.
همدارنګه د «قلم لار» بنسټ بنسټګر مطيع الله ويسا له کلونو راهيسې زده کړو ته د ليرې پرتو سيمو د ماشومانو د لاسرسي په برخه کې هڅې کوي. نوموړی اوس مهال د طالبانو په زندان کې دی.
اغلې نيومن زياته کړې چې طالبانو ويسا د ماشومانو له زده کړو څخه د ملاتړ په «جرم» زنداني کړی دی.
