اطلاعات روز: «د افغانستان د اسلامي جمهوريت» د ډيپلوماټانو د انسجام ټولنې د يوې اعلاميې په خپرولو سره ويلي، چې په افغانستان کې ښځې له پراخ جنسيتي اپارتايډ سره مخ دي او د روم د اساسنامې غړي هيوادونه بايد د دې «بشر ضد وضعيت» د تعريف او رسميت پيژندنې لپاره حقوقي اقدامات وکړي.
د دې ټولنې په اعلاميه کې چې تېره شپه (سېشنبه، ۲۱ د وږي) خپره شوې، راغلي چې پر هيواد د طالبانو له «تحميلېدو» سره د افغانستان د وګړو په ځانګړې توګه د ښځو حقونه تروړل شوي او ښځينه ټولنه له ډول – ډول شکنجو او جنسيتي تبعيض سره مخ شوې ده.
د پخواني دولت د ډيپلوماټانو د انسجام ټولنې ويلي، چې د افغانستان ښځې د اسلامي لارښوونو او بنسټيزو انساني حقونو له مخې خپل حقونه غواړي.
د دې ټولنې په اعلاميه کې راغلي چې قوانين او نړيوال نظام د انساني کرامت او بنسټيزو بشري ارزښتونو خونديتوب ته ژمن دي، خو په افغانستان کې د ښځو حقونه د طالبانو تر واک لاندې په بې مخينې توګه تروړل کېږي او له پراخ جنسيتي اپارتايډ سره مخ دي.
«د افغانستان د اسلامي جمهوريت» د ډيپلوماټانو د انسجام ټولنې ويلي، چې له دې سره-سره نړيواله ټولنه په ځانګړې توګه د افغانستان په قضيه کې ښکېل هيوادونه يوازې ننداره کوي او د بشري حقونو بنسټونه هم د سياسي ملاحظاتو له امله د جنسيتي اپارتايډ له رسميت پيژندنې ډډه کوي.
دې ټولنې د يو شمير ښځينه فعالانو د نه خوراک د اعتصاب ملاتړ کړی او له نړيوالې ټولنې او د روم د اساسنامې له غړو هيوادونو يې غوښتي چې د افغانستان اوسنيو شرايطو ته په پام بايد «په افغانستان کې د روان وضعيت د مخنيوي» په موخه د جنسيتي اپارتايډ د تعريف او رسميت پيژندنې لپاره لازم حقوقي اقدامات وکړي.
په دې وروستيو ورځو کې يو شمېر بهر مېشتو ښځو د نه خوړلو اعتصاب کړی و او غوښتنه يې کوله چې د طالبانو تر واکمنۍ لاندې افغانستان بايد د يوه داسې هيواد په توګه وپېژندل شي چې جنسيتي اپارتايډ پکې روان دی.
په افغانستان کې د بشري حقونو په چارو کې د ملګرو ملتونو ځانګړي راپورچي ريچارډ بېنټ د بشري حقونو د شورا په څلور پنځوسمه غونډه کې د خپلو خبرو پر مهال وويل، چې په افغانستان کې سيسټماټيک، پراخ او بنسټيز شوی تبعيض چې د ژوند له بېلابېلو اړخونو د ښځو د حذف په لټه کې دی د جنسيتي اپارتايډ د تکامل کوونکې پديدې ارزول يې ضروري کړي دي.
