اطلاعات روز: په کابل کې د «ازادۍ پر لور د ښځو خوځښت» په نوم یو شمیر معترضو ښځو په يوه سرپټي ځای کې د يوې اعتراضي غونډې له لارې له نړۍ وغوښتل چې په افغانستان کې جنسيتي اپارتايډ په رسميت وپېژني.
همدا راز دې ښځو په افغانستان کې د ښځو د «سيسټماټيکو او هدفي» وژنو د مخنيوي غوښتنه هم کړې ده.
دوی د «عدالت، عدالت، ستړې يو له جهالت» او «طالبان جنايت کوي، نړۍ يې حمايت کوي» شعارونه بدرګه کړي.
معترضو ښځو له نړۍ غوښتي چې د طالبانو ملاتړ دې نه کوي او دا ډله دې په رسميت نه پېژني.
د جرمني د کلن په ښار کې يو شمېر افغان ښځينه فعالانو هم په افغانستان کې د ښځو وضعيت ته د نه پاملرنې په اعتراض کې خوراکي اعتصاب کړی او له نړۍ غواړي چې په دې هيواد کې جنسيتي اپارتايډ په رسميت وپېژني.
پرون (يکشنبه، ۱۲ د وږي) د دې فعالانو د غذايي اعتصاب دوولسمه شپه وه.
يوه له اعتصاب کوونکو تمنا زرياب پرياني وايي، چې د دې او ملګرو روغتيايي وضعيت يې سم نه دی، خو خپل اعتصاب ته دوام ورکوي.
طالبانو په افغانستان کې د واک له تر لاسه کولو وروسته، د ښځو او نجونو پر حقونو سخت محدوديتونه لګولي دي.
اوس مهال ښځې او نجونې د کار، زده کړو او ازاد تګ-راتګ اجازه نه لري.
د بشري حقونو فعالان وايي، چې له ښځو او نجونو سره د طالبانو چلند ښايي «د جنسيت پر اساس بشري جنايت او جنسيتي اپارتايډ وبلل شي».
د ملګرو ملتونو کارپوهانو هم په تازه توګه ويلي، چې په افغانستان کې د جنسيتي اپارتايډ بحث اړين دی.
