اطلاعات روز: په بهر کې «د افغانستان د اسلامي جمهوريت» سياسي او قونسلي استازوليو د تروريزم د قربانيانو د نړيوالې ورځې په مناسبت خبرداری ورکړی چې د افغانستان کړکېچ ته د نه رسيدګۍ پايلې به د تروريزم او افراطيت ګواښ زيات کړي.
نن (دوشنبه، ۳۰ د زمري) چې د اګسټ له ۲۱مې سره برابره ده، د تروريزم د قربانيانو د ياد او هغوی ته د درناوي نړيواله ورځ ده.
سياسي او قونسلي استازوليو د يوې اعلاميې په خپرولو سره ويلي، چې دا ورځ د افغانستان لپاره ځانګړی ارزښت لري.
د دې استازوليو په وينا، د افغانستان خلک د دې ګواښ د ماتولو لپاره د نړيوالو هڅو په لومړۍ کرښه کې ولاړ دي.
سياسي او قونسلي استازوليو د تروريزم د عاملينو د محکمه کېدو له لارې په افغانستان او ټوله نړۍ کې د تروريزم د قربانیانو لپاره د عدالت پر تأمينېدو ټينګار کړی دی.
دې استازوليو زياته کړې، چې پر افغانستان د طالبانو واکمنېدو وضعيت پېچلی کړی او څه چې بايد تر لاسه شوي وای، له هغه څخه زيات واټن لري.
د افغانستان سياسي او قونسلي استازوليو په اعلاميه کې راغلي: «زموږ خلک لاهم له يوه سياسي، امنيتي او اقتصادي کړکېچ سره مخ دي چې بدتر کېږي او زموږ د ميليونونو هيوادوالو ژوند اغېزمنوي. که د افغانستان کړکېچ حل نشي، په افغانستان او له هيواده دباندې به د تروريزم او افراطيت د ګواښ د زياتېدو په ګډون، خطرناکې پايلې ولري.»
دې استازوليو ټينګار کړی، چې د هغو ټولو افغانانو او د افغانستان دوستانو ته چې په تروريستي بريدونو کې يې ژوند بايللی د درناوي تر ټولو ښه لار د هغه هدف تر لاسه کول دي چې په پام کې نيول شوی دی: په يوه متحد، باثباته او ډيموکراټيک افغانستان کې د واقعي سولې تضمين.
پر افغانستان د طالبانو تر واکمنېدو وروسته، په ځلونو اندېښنې ښودل شوي چې دا هيواد د تروريزم په پناهځای بدلېږي.
خو طالبان په افغانستان کې د تروريستي ډلو شتون ردوي.
