اطلاعات روز: د کډوالۍ نړيوال سازمان وايي، چې د افغانستان ۷۹ سلنه وګړي د څښاک، پخلي، حمام کولو او مينځلو لپاره کافي اوبو ته لاسرسی نه لري.
دغه سازمان نن (چهارشنبه، ۲۵ د زمري) پر ايکس کاريال په يوه خپره کړې ليکنه کې کاږلي، چې کافي اوبو ته نه لاسرسی په ټول افغانستان کې د اوبو او روغتيا کړکېچ ښيي.
د کډوالۍ نړيوال سازمان ويلي، چې د ۲۰۲۲ کال پر مهال يې په افغانستان کې ۱۶۰ زرو خلکو ته د څښاک د اوبو او روغتيا په برخه کې خدمات وړاندې کړي دي.
دې بنسټ زیاته کړې، چې د ۲۰۲۳ پر مهال ۲.۳ ميليونه وګړو ته د څښاک د اوبو او روغتيا په برخه کې د خدماتو وړاندې کولو لپاره د ۳۳ ميليونه ډالرو بودیجې ته اړتيا لري.
د کډوالۍ نړيوال سازمان په افغانستان کې د اوبو او روغتيا کړکېچ ته په اشارې کولو سره ټينګار کړی چې «وخت له لاسه وزي».
سږکال د هيواد وګړي په بېلابېلو ولايتونو کې له سختې وچکالۍ او د څښاک اوبو ته د نه لاسرسي له امله شکايت کوي.
په تېرو مياشتو کې د کابل د لوېديځ دشتي برچي سیمې ځينې انځورونه خپاره شول چې په کې لسګونو خلک له يوې څاه څخه د څښاک د اوبو تر لاسه کولو لپاره په لیکه کې ولاړ وو.
د ملګرو ملتونو د بشري مرستو همغږي کوونکي دفتر (اوچا) وړاندې اعلان کړی و چې افغانستان له تېرو پرلپسې دریو کلونو راهيسې له سختې وچکالۍ سره مخ دی.
د دې بنسټ د شمېرو له مخې، افغانستان د هغو لسو هيوادونو په کتار کې څلورم دی چې د اقليمي بدلونو له سختو اغېزو سره مخ دی.
