اطلاعات روز: د امريکا د بهرنيو چارو د وزارت مرستيال وياند ودانت پاټيل وايي، چې د افغانستان د خلکو ملاتړ او په دې هيواد کې انساني او اقتصادي کړکېچ ته رسيدګي د واشنګټن لپاره بېړنی لومړيتوب دی.
نوموړي دا څرګندونې پرون (دوشنبه، ۲۳ د زمري) د يوې خبري ناستې پر مهال د افغانستان د سولې لپاره د امريکا د پخواني استازي زلمي خليلزاد د څرګندونو په تړاو د يوې پوښتنې په ځواب کې کړې دي.
خليلزاد په تازه توګه ويلي، چې د دې هيواد سياستوال دې خپل وطن ته ولاړ شي او د حکومت د جوړولو لپاره دې له طالبانو سره مذاکره وکړي.
ده ويلي، چې متحده ايالات نور ژمن نه دي چې افغانستان ته سياستوال ولېږي، يا هم له هغوی سره مرسته وکړي چې افغانستان ته ولاړ شي.
د خليلزاد څرګندونو پراخ منفي غبرګونونه راپارولي دي.
د امريکا د بهرنيو چارو وزارت مرستيال وياند د دې پوښتنې په ځواب کې چې ايا خليلزا د يوه رسمي امريکايي چارواکي په توګه خبرې کوي، وويل چې دی داسې نشي کولای او د بهرنيو چارو د وزارت او يا هم د متحده ايالاتو د دولت په استازيتوب نه غږېږي.
ده زياته کړې: «څه چې مې غوښتل ووايم، هغه دادي چې متحده ايالات په نهايت کې يو داسې افغانستان غواړي چې له خپل ځان سره په سوله کې وي، له خپلو ګاونډيانو سره په سوله کې وي او وکولای شي چې پر خپلو پښو ودرېږي او د افغانستان په تړاو زموږ سياست پر همدې هدف راڅرخي. د افغانستان د خلکو ملاتړ او د افغانستان روان انساني او اقتصادي کړکېچ ته رسيدګي زموږ لپاره بېړنی لومړيتوب دی.»
د امريکا د بهرنيو چارو د وزارت مرستيال وياند زياته کړې چې متحده ايالات له افغانستان سره د بشري مرستو ستر مرسته کوونکی دی.
ده ويلي، چې امريکا د ۲۰۲۱ کال له اګست مياشتې راهيسې د افغانستان له خلکو سره د ژغورنې په برخه کې تر ۱.۹ ميليارد ډالرو ډېره مرسته کړې ده.
