اطلاعات روز: په خوست ولایت کې تېره شپه (جمعه، ۶ د زمري) د راوتلو سېلابونو له کبله د ښځو او ماشومانو په ګډون د یوې کورنۍ پنځه غړو خپل ژوند له لاسه ورکړی دی.
په دغه ولایت کې ځايي سرچینې وايي، سېلاب دغه ځاني تلفات د مرکز اړوند «شمل» سیمه کې اړولی چې د یوې کورنۍ د مور او پلار په ګډون د هغوی دوه زامن او یوې لور یې خپل ژوند له لاسه ورکړی دی.
سرچینې زیاته کړه، چې د دغو کسانو جسدونه په محمد حسن کلي کې پیدا شوي او د مندوزیو ولسوالۍ د ځايي خلکو له لوري له اوبو څخه را ایستل شوي دي.
په خوست ولایت کې د طالبانو ولایتي مسوولینو تر اوسه د بېګاه شپې د سېلابونو له امله د ځاني او مالي تلفاتو په اړه څه نه دي ویلي، له تېرو دوو اونیو راهیسې د خوست په ګډون په پکتیا، پکتیکا، میدان وردګ او د هیواد په ګڼو نورو ولایتونو کې د سېلابونو له امله خلکو ته په لویه کچه مالي او ځاني زیانونه رسېدلي دي.
سېلاب ځپلې خلک په ډیری سیمو کې اوس مهال د سرپناه او خوراکي توکو له نشتون سره مخ دي او د طالبانو په حکومت او نورو نړیوالو موسېساتو غږ کوي چې دوی سره دې بیړنۍ مرستې وکړي.
