اطلاعات روز: نورستان کې ځايي خلک شکایت کوي، چې دغه ولایت کې په زیاته کچه لوستي ځوانان د بې کارۍ له امله له سختو اقتصادي سونزو سره مخ دي.
ولسي خلک وايي، د دغه ولایت په مرکز او اوو ولسوالیو کې زرګونه هغه ځوانان چې د لېسانس تر کچې یې زده کړې کړي بې کاره ګرځي او دې چارې له رواني ستونزو سره مخ کړي دي.
دوی د پخواني ړنګ شوي «جمهوري نظام» ترڅنګ د طالبانو پر اوسني رژیم هم تور پورې کوي، چې د دغه ولایت خلکو ته یې کاري برخه کې هیڅ نه دي کړي.
د نورستان په مرکز پارون کې د قومي مشر جمعه دین د معلوماتو له مخې د دغه ولایت په مرکز او ولسوالیو کې شاوخوا ۳ زره لوستي ځوانان بې دندې ګرځي او حکومتونو ورته کاري زمینې نه دي برابرې کړي.
نوموړی وايي، دغو ځوانانو په بېلابېلو برخو کې لوړې زده کړې کړي او په ځلونو یې ورته د کاري زمینې برابرولو په موخه د دولتي چارواکو دروازې ټکولي، خو په خبره یې هېچا یې غږ ته ارزښت نه دی ورکړی.
جمعه دین زیاتوي: «د نورستان له اوو ولسوالیو څخه د بې کاره ځوانانو یوه مستنده ډېټا جمع کړې ده، چې تقریبا د بې کاره ځوانانو هغه ځوانان چې تعلیم یافته دي، لېسانس دي د هغوی شمېر تقریباً ۳۰۰۰ نفرو ته رسېږي، چې هغوی د لېسانس تر کچې تعلیم لري، له مختلفو بخشونو نه فارغ دي د طب نه، د انجینرۍ نه، د زراعت نه، د حقوقو نه او د شرعیاتو نه.»
د نورستان اوسېدونکي دغه راز پخوانی ړنګ شوی جمهوریت او د طالبانو اوسنی رژیم له دوی سره په دوه ګوني چلند تورنوي.
د پارون اوسېدونکی حاجي سرتور وايي، تېر حکومت او د طالبانو حکومت په نورو ولایتونو کې ګڼې ټولګټې پروژې او کاري فرصتونه برابر کړي وو، چې د نورستان خلک دواړو حکومتونو څنډې ته ساتلي.
نوموړی زیاتوي: «اوس چې د امارت اسلامي کوم دور راغلی دی، تقریبا چې یو نیم کال نه اضافه کېږي، مونږ د مطبوعاتو له لارې ګورو چې په نورو ولایتونو کې مختلفې پروژې افتتاح کېږي او روان کار یې ګورو، خو بدبختانه چې تر اوسه پورې په نورستان کې داسې پروژې، چې عام المنفعه وي لا شروع کړې نه دي.»
د نورستان خلک دغه راز وايي، چې په وروستیو کې د نړۍ والو مرستندویه موسېسو په مالي ملاتړ یو شمېر کوچنۍ ټولګټې پروژې پېل شوي، چې د دوی ستونزې نه شي حل کولی.
موږ هڅه وکړه، چې د نورستان د ځايي خلکو نیوکې د دغه ولایت له ولایتي چارواکو سره شریکې کړو، خو له پرلپسې هڅو او انتظار سره سره بیا هم د نورستان لپاره د طالبانو ولایتي چارواکو زموږ اړیکې او پوښتنې ته ځواب رانکړ.
نورستان د تېر جمهوري حکومت په وروستیو کلونو کې د هېواد په کچه درېیم ملي پارک نومول شوی و او د وخت لوړ پوړو چارواکو دې ولایت ته د ځانګړې پاملرنې ژمنې کړې وې، خو ځايي خلک وايي، تر ړنګېدو یې د پام وړ کار پکې نه وو شوی.
