اطلاعات روز: ننګرهار کې طالب مسوولین خبر ورکوي چې د دغه ولایت په خوږیاڼو ولسوالۍ کې د یو ښوونځي ۳ کوچنۍ نجونو د اوبو په ډنډ کې د ډوبیدو له امله خپل ژوند له لاسه ورکړی دی.
د ننګرهار لپاره د طالبانو د پوهنې ریاست ویاند فرهاد احمد ستانکزی وایي، چې پېښه پرون سهار (چهارشنبه، ۴ د زمري) د خوږیاڼو ولسوالۍ اړوند «ارغچ» سیمه کې هغه مهال رامنځته شوې، چې د ارغچ په نامه د منځني ښوونځي د څلورم ټولګي څلور کوچنۍ زده کوونکې ښوونځي ته پر لاره وې.
هغه زیاتوي په یاده سیمه کې څلور واړه زده کوونکې د اوبو یوه ډنډ ته لویدلي، چې د خلکو په مرسته یوه ماشومه ژغورل شوې او درې نورو زده کوونکو خپل ژوند بایللی دی.
تراوسه د یادې پېښې لامل معلوم نه دی چې څه ډول څلور زده کوونکې د اوبو ډنډه ته غورځیدلې دي؟
په ورته مهال د ننګرهار په کامې ولسوالۍ کې یو کس د لامبو پرمهال اوبو ډوب کړي او مړ شوی دی.
د کامې ولسوالۍ یو اوسیدونکی عبدالوهاب وایي، چې پېښه نن غرمه مهال د یادې ولسوالۍ اړوند د «کامې پل» سیمه کې هغه مهال رامنځته شوې چې د فلک نیاز په نامه یو کس د کونړ په سیند کې دلامبلو پرمهال اوبو ډوب کړی او خپل ژوند یې له لاسه ورکړی دی.
د ګرمۍ په موسم کې هر کال ګڼ شمیر خلک په سیندونو کې د لامبو پرمهال د بې احتیاطۍ له امله خپل ژوند له لاسه ورکوي.
