اطلاعات روز: په میدان وردګو، کونړ او پکتیا کې طالب مسوولین خبر ورکوي چې په دې ولایتونو کې د سختو ورښتونو او راوتلو سیلابونه له امله ۲۲ کسان مړه شوي، ۴۰ لادرکه دي او سلګونه کورونه ویجاړ شوي دي.
په میدان وردګو کې د طالبانو د والي دفتر وايي، چې د تېرې شپې (شنبه، ۳۱ د چنګاښ) سیلابونو د دغه ولایت په جلریز، چک، سید اباد، نرخ او جغتو ولسوالیو ۲۲ کسان مړه کړي او ۴۰ نور لادرکه دي.
دغه فتر زیاته کړې، چې سلګونه د استوګنې کورونه او زرګونه جریبه کرنیزه ځمکه هم ویجاړه شوې ده.
د یاد دفتر د معلوماتو له مخې، د کابل – باميان لويه لار او د ميدان وردګو د ولسواليو ځينې لارې هم تړل شوې دي.
ورته مهال کونړ کې د طبیعي پېښو پر وړاندې د چمتووالي ریاست لپاره د طالبانو مسوولین وایي، چې تېره شپه د دغه ولایت په مرکز اسعد اباد او وټه پور ولسوالۍ کې ورښتونو او سیلابونو ځایي خلکو ته درانه مالي زیانونه رسولي.
د دغه ریاست د زیانونو آمر احسان الله وایي، د دغو ورښتونو او سیلابونو له امله په اسعد آباد او وټه پور ولسوالۍ کې شااوخوا ٥٨ استوګنیز کورونه، لسګونه جریبه کرنیزه ځمکه، یو باب مسجد، د چرګانو دوه فارمونه، د پاکو اوبو یوه شبکه، یو هوټل، دوه هټۍ، سړکونه، د اوبو ویالې، استنادي دېوالونه او د برېښنا ستنې تخریب شوي دي.
نوموړي د ځاني زیان په اړه څه نه دي ویلي.
دغه راز پکتیا کې پېښو ته د رسېدو ریاست طالب مسوولین وايي، چې په روحاني بابا او ګردې څېړۍ ولسوالیو کې د ورښتونو او سېلابونو له کبله ۱۲ د استوګنې کورونه نړېدلي او د دې سربېره یې د بزګرانو پراخه کرنیزې ځمکې هم له منځه وړې دي.
د مسوولینو په خبره چې یاد زیان د روحاني بابا ولسوالۍ اړوند کلاکي او نجارانو په سیمه او د ګردې څېړۍ ولسوالۍ په سروخېلو سیمه کې اوښتی دی.
له سېلابونو زیانمن شوي خلک له اړونده مرسته کوونکو ادارو غوښتنه کوي چې له دوی سره دې په سرپنا او لومړنیو خوراکي موادو برخه کې همکاري وکړي.
تېره شپه د کابل ارغندې ولسوالۍ هم د سختو بارانونو شاهده وه.
د راپورونو له مخې، سیلابونو په دې ولسوالۍ کې هم زیانونه اړولي دي.
د تېرې شپې د ورښتونو او سېلابونو له امله د اوښتو تلفاتو او زیانونو عمومي شمیرې تر اوسه نه دي خپرې شوي.
