اطلاعات روز: د کرکټ نړیوالې شورا (ICC) د افغانستان د کرکټ ملي لوبډلې مشر روزونکی جانتن ټروټ او لوبغاړی عظمت الله عمرزی له بنګله دېش سره په دويمه شل اوريزه لوبه کې د دغې شورا د اخلاقي اصولو د ماتولو له کبله جريمه کړي دي.
ټروټ د باران د دمې پر مهال د لوبڅار پر پرېکړې د ناخوښۍ له کبله د یادې لوبې د فيس ۱۵ سلنه جريمه شوی دی. کله چې لوبڅار د باران د دمې د اوږدولو پرېکړه وکړه، نو ټروټ د سر په ښورولو او په ټيټ اواز د يو څه په ويلو خپله ناخوښي څرګنده کړه.
عمرزی هم د لوبې د فيس ۱۵ سلنه جریمه شوی ځکه چې د لوبې پر مهال يې داسې حرکت کړی و او داسې څه يې ويلي و، چې د یوه سوځول شوي توپ وهونکي توند غبرګون يې راپارولی شو. دا پېښه هغه مهال وشوه چې کله عمرزي د بنګله دېش لوبغاړی توحيد هریدوی وسوځاوه او د ده مخ ته په ورتلو يې په غوسه ورته له لوبغالي د وتلو اشاره وکړه.
ټروټ او عمرزي دواړو دا پرېکړه منلې ده.
د تېرو دوو کلونو پر مهال دا لومړی ځل دی چې ټروټ او عمرزي جریمه کېږي . ټروټ اوس د بدنامۍ دوه نومرې لري، خو عمرزی يو لري. که يو لوبغاړی په ۲۴ مياشتو کې دننه تر څلور زيات د بدنامۍ نومرې تر لاسه کړي، نو يوه مياشت له لوبو بندېږي.
