اطلاعات روز: د افغانستان د کرکټ بورډ مسوولین وایي، چې د بورډ د کورني کرکټ څانګې په لارښوونه یې ننګرهار کې د ۴۸ کلبونو ترمنځ سیالۍ پېل کړي چې دوه میاشتې به دوام وکړي.
د کرکټ بورډ د کورني کرکټ مرستیال حلیم احمدزی وایي، دغه سیالۍ نن (پنج شنبه، ۲۹ د چنګاښ) د ننګرهار اړوند د نجیب الله ترکي لوبغالي کي پېل شوې.
نوموړی زیاتوي یادې سیالۍ به دوه میاشتې دوام وکړي، چې موخه یې د ولایت په کچه کرکټ لوبې ته وده ورکول او د لوبغاړو ترمنځ د ښې همغږۍ رامنځته کول دي.
احمدزی زیاتوي: «سږکال به د انټرکلب سیالۍ د هیواد په ۳۱ ولایتونو کې ترسره کیږي انشاءالله اوس مهال په ۱۵ ولایتونو کې پای ته رسیدلي او په ۶ ولایتونو کې پېل شوي، ننګرهار کې په دې سیالیو کې تقریباً ۴۸ کلبونه ګډون لري او ۱۵۲ لوبې به کوي او دوه میاشتې به دوام ولري.»
لوبغاړي هم دا لوبې د ځان لپاره يو ښه فرصت بولي، چې له دې لارې به وکولای شي د زون او بیا ملي لوبډلې ته لاره پيدا کړي.
نصیرخان چې په دې لوبو کې لوبېږي د کرکټ بورډ له ادارې غواړي چې کورنی کرکټ لا پراخه کړي.
نصیر خان زیاتوي: «که چیرې یو لوبغاړی خپل استعداد همدې سیالیو کې معلوم کړي، نو هغه کولای شي مخکې لاړ شي او له همدې لارې د هیواد نماینده ګي هم کولای شي؛ غوښتنه کوو چې دا ډول لوبې دې لا زیاتې شي او هم غوښتنه کوو چې دا ډول لوبې سپانسر شي او ملاتړ دې وشي.»
د کرکټ روزونکی فطرت الله هم دا لوبې د لوبغاړو لپاره ګټورې ځکه بولي چې وایي، له دې ځایه یو لوبغاړي د کرکټ لومړني اصول زده کوي.
فطرت الله زیاتوي: «دا ډیرې مهمې سیالۍ دي ځکه د یوه لوبغاړي بنسټ چې په انټرکلب سیالیو کې جوړ شي او د کرکټ په قوانیونو پوه شي او له نورو ملي لوبغاړو سره سیالۍ ترسره کړي او د هغوی له تجربو برخمن شي نو دا به ډیرې مهمې سیالۍ وي.»
د افغانستان کرکټ بورډ د معلوماتو له مخې د داخلي کلبونو ترمنځ د کرکټ یادې سیالۍ په ۳۱ ولایتونو کې ترسره کیږي، چې په ۱۵ ولایتونو کې پای ته رسیدلي او د ننګرهار په ګډون په ۶ ولایتونو کې دوام لري.
ننګرهار د هېواد په کچه یو له هغو ولایتونو دی، چې د کرکټ استعدادونه او مینه وال پکې تر نورو سیمو زیات دي.
