اطلاعات روز: د پکتیا ولایت په ډنډپټان ولسوالۍ کې ځايي سرچینې وايي، له «ډیورنډ فرضي کرښې» پورې غاړه کرمه ایجنسۍ کې د شیعه او سني دوو قومونو ترمنځ له پېل شوې وسله والې شخړې وروسته افغان لوري ته د پټان-پړاچنار ترمنځ د «خرلاڅي» لاره د هر ډول تګ- راتګ پر مخ له تېرو دریو ورځو راهیسې تړل شوې ده.
د سرچینې په حواله چې د کرښې دواړه غاړو ته اوس مهال په ګڼ شمېر کې بار وړونکي موټر او خلک انتظار دي او ترڅنګ یې پاکستان ته انتقالېدونکي ناروغان له سختو ستونزو سره مخ دي.
دغې سرچینې چې نه یې غوښتل نوم یې څرګند شي زیاته کړه چې په سیمه کې لاهم د لارې د خلاصون په اړه هیڅ معلومات نه دي ورکړل شوي چې دا لاره به څه وخت بیرته پرانیستل شي.
د خرلاڅي لارې د تړل کېدو او هلته بندو افغانانو ته د راتګ په اړه د طالبانو حکومت او پکتیا کې یې ولایتي مسوولینو تر اوسه رسمي څه نه دي ویلي.
د پاکستاني خبریالانو د معلوماتو له مخې افغان لوري ته دا لاره په داسې مهال تړل کیږي چې په کرمه ایجنسۍ کې د شعیه او سني قومونو ترمنځ په رامنځته شوې وسله واله نښته کې دواړو غاړو ته تر دې دمه ۱۲ کسان وژل شوي او له ۵۰ ډېر ټپیان شوي هم دي.
تر اوسه لا نه دی معلومه چې له کرښې پورې غاړه رامنځته شوې شخړه د څه له امله ده، خو له دې وړاندې هم دوی د غره او ځمکې پر سر له یو بل سره وسله والې شخړې کړې دي.
