اطلاعات روز: ننګرهار کې د طالبانو روغتیایي چارواکي خبر ورکوي، چې د لوی اختر په تېرو درې ورځو کې د ترافيکي پېښو له امله دوه تنه مړه او ۱۶۸ کسان نور ټپیان شوي دي.
د دغه ولایت لپاره د طالبانو د عامې روغتيا رياست وياند نقيب الله رحيمي نن (شنبه، ۱۰ د چنګاښ) وويل، چې د لوی اختر په درېيو ورځو کې په مرکز جلال اباد ښار او ولسوالیو کې د ترافیکي پيښو څخه ۱۷۰ تنه ټپیان د ننګرهار سیمه ییز تخصصي، بي بي فاطمة الزهرا ولایتي او د ولسوالیو یو شمېر روغتونونو ته راوړل شوي دي.
د نوموړي په خبره د ټپيانو له ډلې یې ۲ تنو خپل ژوند له لاسه ورکړی او نور کسان له درملنې وروسته رخصت شوي دي.
رحیمي زیاتوي: «په دوی کې یې زیاتره کم عمر لرونکي ځوانان وو، چې د موټرو د ګړندي له امله یې ټکرې کړي.»
عام خلک هم په دې وروستیو کې د ترافیکي پېښو زیاتیدو اندیښمن کړي او د مخنیوي په برخه یې د طالبانو له حکومت د جدي اقداماتو غوښتنه کوي.
هر کال د اخترونو او نوي کال د رخصتیو پرمهال د هیواد په بېلابېلو سیمو کې د ترافیکي پېښو له امله ګڼ شمیر کسان خپل ژوند له لاسه ورکوي، چې زیاتره یې کم عمره ځوانان وي.
نیمروز کې هم د اختر په دویمه ورځ یوې ترافیکي پیښه کې د یوې کورنۍ دوه کسان مړه او یو ماشوم ټپي شوی دی.
