اطلاعات روز: کونړ کې د طالبانو سیمه ییز چارواکي وایي، چې د دغه ولایت د پېچ درې ولسوالۍ په ځنګل کې اور لګیدلی او لاهم د اور لمبې په شدت سره روانې دي.
په دې ولایت کې د طالبانو د پېښو پر وړاندې د چمتووالي رییس ثابت الله صدیقي وایي، دغه اور لګېدنه نن سهار (شنبه، ۳ د چنګاښ) شاوخوا ۶:۰۰ بجې د پېچ درې ولسوالۍ په «کوړنګل او سندرۍ» رامنځته شوې چې په زیاته اندازه ځنګل او د څارویو څړ ځایونه د اور خوراک شوي دي.
نوموړی زیاتوي، ځنګل کې د اور وژنې لپاره له سیمې څخه شاوخوا ٨٠ کسان ورغلي، خو په خبره یې د اور وژنه د هغوی له وسې پورته ده او د طالبانو له مرکزي حکومت یې د مرستې غوښتنه کړې.
نوموړي نه دي ویلي، چې تر اوسه په څومره اندازه ځنګل سوځېدلی، خو زیاتوي چې لا هم په ځنګل کې د اور څپې په ډېر شدت روانې دي.
تېر کال هم د کونړ او نورستان ولایتونو په ځنګلونو کې اور لګېدنه را منځته شوې وه، چې له امله یې په سلګونه جریبه ځنګل د اور خوراک ګرځېدلی وو.
په دې وروستیو کې د نړۍ د نورو هېوادونو په څېر په افغانستان کې هم ځنګلونو کې اور لګېدنې زیاتې شوي، چې خلک یې تر ډېره د اقلیم بدلون او د تودوخې درجې لوړوالی بولي.
