اطلاعات روز: ننګرهار ولایت کې طالب مسوولین وایي، چې د دغه ولایت په پښتونستان واټ کې یې یو تاریخي توپ نصب او نندارې ته ایښی دی.
د جلال اباد ښاروالۍ لپاره د طالبانو ښاروال نعمت الله اخند وایي، دا توپ یې د ننګرهار ولایت مقام مخې ته په پښتونستان واټ کې ځکه نصب کړی څو بهرني اتباع د دې توپ په لیدلو سره وپوهیږي چې دوی د تاریخي اثارو ساتنه کوي.
نوموړي چې تیره شپه په همدې تړاوو په جوړو شویو مراسمو کې خبرې کولې وویل، له دې تاریخي توپ څخه دوه پېړۍ د وخت معلومولو په موخه ګټه اخیستل کېده چې اوس د نندارې او تاریخي ارزښت په موخه د هېوادوالو نندارې ته ایښودل شوی دی.
فرهنګي فعال نصیب الله ژمن هم په پښتونستان واټ کې د دې تاریخي توپ د نصبولو اقدام ستایي او له مسوولینو غوښتنه کوي، چې د دا ډول پخوانیو اثارو ساتنې ته دې پاملرنه زیاته شي.
ژمن زیاتوي: «تاریخي اثار زمونږ نسلونو لپاره ښه دي هغوی به یې ګوري او دا به یو تاریخ پاتې کیږي.»
ولسي خلک که څه د دې چارې ستاینه کوي، خو ځینې یې له توپ غونډۍ څخه پښتونستان واټ ته د دې توپ له راوړلو سره مخالفت څرګندوي او وایي، چې تاریخي اثار باید په خپل ځای پاتې شي او د دې پر ځای باید په خپل پخواني ځای کې نصب شوی وی.
د جلال اباد ښار اوسیدونکی نویدالله وایي، د طالبانو حکومت ته په کار ده چې دا ډول تاریخي اثار په خپلو پخوانیو سیمو کې ځای پر ځای او هملته دې ساتنه ترې وکړي.
د توپ غونډۍ دغه توپ ډېره پخوانۍ مخینه لري، چې ویل کېږي د روژه ماتي پېشنمي او غرمې په وخت کې به پرې ډز کېده، چې خلکو به د دې توپ په ډز روژه ماتوله او نېوله.
