اطلاعات روز: د طالبانو وياند ذبيح الله مجاهد د ملګرو ملتونو د امنيت شورا د تعزيراتو کميټې د شننې او څارنې د ټيم وروستی راپور «يو اړخيز، غیر متوازن او له واقعيته لېرې» ګڼلی دی.
نوموړي نن (يکشنبه، ۲۱ د غبرګولي) د يوې اعلاميې په خپرولو سره ويلي، چې د ملګرو ملتونو د امنيت شورا داسې راپورونه او د بنديزونو دوام «له تعصبه ډک او د استقلال او نه لاسوهنې له اصولو سره په تضاد کې دي».
ذبيح الله مجاهد زياته کړې چې د ملګرو ملتونو د امنيت شورا په راپور کې د طالبانو پر خلاف «بې بنسټه» تورونه لګول شوي دي.
ده ویلي چې د طالبانو د مشرانو تر منځ د اختلافاتو، په افغانستان کې د تروريستي ډلو د شتون، د نشه يي توکو په قاچاق کې د طالب غړو د لاس درلودلو او د دې ډلې له لوري د واک د انحصار په اړه ادعاوې، بې بنسټه او «له خلکو او خپلواک نظام سره ښکاره دښمني او د تېرو ۲۰ کلونو د بې ګټې او مغرضو تبليغاتو تکرار» دی.
د ملګرو ملتونو د امنيت شورا د تعزيراتو کميټې د شننې او څارنې ټيم په خپل راپور کې ويلي، چې طالبانو د ۱۹۹۰ کلونو «پښتونمحوره استبدادي» سياستونو او حذف ته مخه کړې ده.
دې ټيم د خپل راپور په يوه برخه کې ويلي، چې د دولت په جوړښت او محلي ادارو کې د سمتونو د ويش پر سر د طالبانو تر منځ د پام وړ اختلافات شته دي.
د دې ټيم په وينا، د طالبانو په رهبرۍ کې اصلي درز د هغو اړخونو تر منځ دی چې په کندهار او کابل کې د واک د مرکزونو استازولي کوي، په دې لړ کې سراج الدين حقاني او ملا يعقوب په کابل کې د واک يو مرکز دی او همدا راز په کندهار او کابل کې ملا هبت الله ته وفادار ملايان هم د واک یو بل مرکز ګڼل کېږي.
د فارسي بي بي سي په وينا، د امنيت شورا د راپور په يوه برخه کې راغلي، چې د طالبانو د کورنيو چارو سرپرست وزير سراج الدين حقاني د مذهبي علماوو په وسيله هڅه کوي چې «د دې ډلې د مشر ملا هبت الله مذهبي مشروعيت تضعيف» کړي او دی د طالبانو په رهبري کې يو نامناسب کس وښيي.
د ملګرو ملتونو د امنیت شورا په راپور کې طالبان تورن شوي چې د القاعدې په ګډون يې له تروريستي ډلو سره اړيکې نه دي پرې کړي او د دوحې پر هوکړه يې عمل نه دی کړی.
د راپور له مخې، له القاعدې او له تحريک طالبان پاکستان ډلو سره د طالبانو اړيکې لا هم پر خپل ځای دي.
د امنيت شورا د شننې او څارنې ټيم په خپل راپور کې زياته کړې، چې داسې نښې شته چې القاعده هڅه کوي خپله عملياتي وړتيا ښه کړي او همدا راز تحريک طالبان پاکستان هم د افغانستان د طالبانو په ملاتړ په پاکستان کې بريدونه کوي.
د طالبانو وياند زياته کړې چې د دې راپور دا ارزونه په کلکه ردوي چې طالبان د ګاونډيو او سيمې د هيوادونو له مخالفينو سره مرسته کوي او يا هم د افغانستان له خاورې د نورو هيوادونو پر خلاف استفاده کوي.
ده ادعا کړې چې د دې راپور له منځپانګې داسې ښکاري چې يا يې ليکونکي اطلاعاتو ته لاسرسی نه لري او يا هم په قصدي توګه حقايق تحريفوي او يا هم د اطلاعاتو سرچينه د طالبانو تښتېدلي مخالفين دي.
مجاهد ويلي، چې طالبان ټينګار کوي چې کړو ژمنو ته پابند دي او دا تضمينوي چې د افغانستان له خاورې به ګاونډيو هيوادونو، سيمې او نړۍ ته هيڅ ډول ګواښ نه وي.
د طالبانو وياند زياته کړې چې په افغانستان کې د نشه يي توکو کرنه، توليد او قاچاق په پراخه کچه کم شوي دي.
د ملګرو ملتونو امنيت شورا په خپل راپور کې ويلي، چې د طالبانو د رهبر د هغه فرمان په اړه د قضاوت کول وختي دي چې د تارياکو د کښت د بندولو په اړه يې ورکړی و.
په دې راپور کې راغلي چې د نشه يي توکو بيې او د متامفتامين توليد زيات شوي دي.
په راپور کې ادعا شوې چې د طالبانو مهم غړي د نشه يي توکو په توليد او قاچاق کې ښکېل دي.
د طالبانو وياند زياته کړې چې د امنيت شورا داسې يو اړخيز او بې باوره راپور خپرول نه يوازې له افغانستان او نړيوالې سولې او امنيت سره مرسته نه کوي، بلکې د خلکو اندېښنې زياتوي او د ملګرو ملتونو استقلال او بې پريتوب نور هم ردوي او د دې سازمان باور ته زيان رسوي.
