اطلاعات روز: لغمان کې طالب چارواکي وايي، چې سږکال یې د «سمسور لغمان» دودیزه مشاعره د نورو کلونو سره په توپير له مرکز لېرې د الینګار ولسوالۍ اړوند «نوري» کلي کې د سیند پرغاړه ترسره کړې ده.
د لغمان لپاره د طالبانو د اطلاعاتو او کلتور ریاست د اطلاعاتو امر عتیق الله قریشي وایي، یاده مشاعره یې لغمان ته د سیلانیانو د پام اړولو په موخه لېرې پرته سیمه کې جوړه کړې.
د هغه په خبره د طالبانو دحکومت په راتګ سره د هیواد له نور سیمو سربیره د لغمان هغه سیمې هم امن شوي، چې مخکې به ترې د جنګونو راپورونه ورکول کیدل او ژوند کول پکې ستونزمن و.
د هغه په خبره دغه ولایت کې هر کال د سمسور لغمان مشاعره د شاعرانو او لیکوالانو د مینې، یوالي او ورورولۍ په موخه ترسره کېږي.
مشاعرې ته د خبرو پرمهال د طالبانو د اطلاعاتو فرهنګ وزارت معین عتیق الله عزیزي وویل، دا ډول مشاعرې د ادب د ودې لپاره مهمې دي او له شاعرانو یې وغوښتل چې د شعر او ادب په ژبه خلک د هیواد ښیرازۍ ته وهڅوي.
هغه زیاته کړه، وزارت یې له دا ډول مشاعرو د ملاتړ سربیره هڅه کوي چې په دې برخه کې شاعرانو ته اسانتیا برابره کړي.
عزیزي زیاته کړه: «نن چې د لغمان په دې سیمه کې مشاعره جوړه شوې ډیر خوښ یم او دا ولس ته د امن ډاډ ورکوي، پخوا همدې خلکو موږ ساتلي یوو او اوس موږ اړ یو چې دوی ته خدمت وکړو، دا ډول مشاعرې ادب ته وده ورکوي او موږ یې ملاتړ کوو.»
مشاعره کې د لغمان سربیره د هیواد د یو شمیر ولایتونو څخه راغلو شاعرانو د شعر خواږه پر ګډونوالو وویشل.
بلخوا د مشاعرې ګډونوال عرفان الله هم لېرې پرتو سیمو کې د دا ډول مشاعرو ترسره کول د سولې او امن پیغام بولي او په وینا یې خلک کولای شي چې په ارامه ژوند وکړي.
لغمان کې هر کال د سمسور لغمان دودیزه پسرلنۍ مشاعره په همدې شپو او ورځو کې ترسره کیږي، چې پکې د دغه ولایت سربېره د افغانستان د نورو ولایتونو شاعران او فرهنګیان هم ګډون کوي.
