اطلاعات روز: د پاکستان د کورنيو چارو وزير رانا ثناالله ويلي، چې د افغانستان طالبانو اسلام اباد ته وړانديز کړی چې د تحريک طالبان پاکستان (ټي ټي پي) غړي له ډيورنډ کرښې څخه د افغانستان نورو سیمو ته ولېږدوي.
د ده په وينا، د دې وړانديز موخه داده چې پاکستاني طالبان د افغانستان او پاکستان سرحدي سيمو ته لاسرسی ونه لري.
د پاکستان د کورنيو چارو وزير دا خبرې د امريکا غږ له اردو څانګې سره په خبرو کې کړې دي، خو ده نه دي ويلي چې اسلام اباد دې وړانديز ته څه ځواب ورکړی دی.
د طالبانو وياند ذبيح الله مجاهد هم د دې وړانديز په اړه ناخبري ښودلې ده.
پاکستاني چارواکي وايي، چې په افغانستان کې د طالبانو تر واکمنېدو وروسته په پاکستان کې د پاکستاني طالبانو بريدونه زيات شوي دي.
د پاکستان د کورنيو چارو وزير ويلي: «پاکستان د دې وضعيت پړه د افغانستان د طالبانو پر اوږو نه اچوي، مګر له شک پرته دا د هغوی د ضعف نقطه ده.»
د تېر کال په کب مياشت کې يوې پاکستانۍ رسنۍ خبر ورکړی و چې د افغانستان طالبانو د پاکستان له دولت سره يوه طرحه شريکه کړې وه چې پاکستاني طالبان به خالي سلا او بل ځای به يې مېشت کړي، خو په دې شرط چې لګښت به يې پاکستان ورکوي.
ايکسپريس ټريبيون په هغه وخت کې ليکلي و چې له ځينو اټکلونو سره سم د تحريک طالبان پاکستان د اتو زرو او ۱۲ زرو تر منځ جنګيالي په افغانستان کې شته دي او که يې د کورنۍ غړي وشمېرل شي نو ټول شمېر یې ۳۰ زره ته رسېږي.
ويل کېږي چې د پاکستاني طالبانو غړي تر ډېره قبايلي سيمو ته څېرمه په سرحدي سیمو کې شتون لري، که څه هم په افغانستان کې طالبان د ټي ټي پي غړو له شتونه انکار کوي.
