اطلاعات روز: د طالبانو د بهرنيو چارو وزارت سرپرست امير خان متقي او په افغانستان کې د ملګرو ملتونو ځانګړې استازې روزا اوتنبايوا «د راتلونکې لپاره د تعامل پر نقشه» خبرې کړې دي.
د طالبانو د بهرنيو چارو وزارت مرستيال وياند حافظ ضيا احمد نن (پنجشنبه، ۱۱ د غبرګولي) پرلپسې ټويټونو کې ليکلي، چې ښاغلي متقي او اغلې اوتنبايوا پرون ورځ سره ليدلي او خبرې يې کړې دي.
ده زياته کړې چې په دې ليدنه کې «دواړو اړخونو د افغانستان او نړيوالې ټولنې د تعامل، د افغانستان او سيمې د اوسني وضعيت او د راتلونکي لپاره د تعامل د لارې پر نقشه خبرې کړي دي».
د حافظ ضيا احمد په وينا، د طالبانو د بهرنيو چارو وزارت سرپرست ويلي، چې د امنيت او ټيکاو تر راتلو وروسته اوس «د دې وخت دی چې د تيوريکو بحثونو پر ځای د ملت د کړاو کمولو لپاره عملي ګامونه واخيستل شي».
د طالبانو د بهرنيو چارو وزارت سرپرست له نړيوالې ټولنې سره د تعامل لپاره خپل «چمتووالی» ښودلی او ويلي يې دي چې طالبان له مرستندويه سازمانونو سره «هر اړخيزه همکاري» کوي.
د طالبانو د بهرنيو چارو وزارت د مرستيال په وينا، په افغانستان کې د ملګرو ملتونو ځانګړې استازې ويلي، چې د دوی لومړيتوب بشري کړکېچ ته رسيدګي او د بشري مرستو تر څنګ د افغانستان له خلکو سره د د پرمختيايي مرستو کول دي.
د طالبانو د بهرنيو چارو وزارت په داسې حال کې له نړيوالې ټولنې سره د تعامل کولو لپاره د چمتووالي خبرې کړي چې تېره ورځ رويټرز خبري اژانس د طالبانو له مشر سره د قطر د لومړي وزير پټه لیدنه افشا کړه.
رويترز د يوې باخبره سرچينې په وينا لیکلي و چې د طالبانو مشر له نړيوالې ټولنې سره د تعامل په اړه خبرو او له نړيوالې انزوا څخه د دې ډلې وتلو ته «ډېر لېوال» دی.
د طالبانو ډله پر افغانستان له بيا واکمنېدو راهيسې د ټول ګډونه حکومت د نه جوړولو، د ښځو پر خلاف د سختدريځو فرمانونو د صادرولو او د بشري حقونو د جدي نقض له وجې له نړيوالې انزوا سره مخ ده او تر اوسه هيڅ هيواد هم د دې ډلې حکومت په رسميت نه دی پېژندلی.
همدا راز دا ډله د ملګرو ملتونو په دفترونو کې د ښځو پر کار د بنديز له وجې له پراخو نړيوالو نيوکو سره مخ ده.
