اطلاعات روز: ارزګان ولایت کې یوه روغتیایي ټیم چې د استرالیا هیواد مالي ملاتړ له ځان سره لري دغلته د سلګونو هغو کسانو وړیا درملنه پېل کړې چې د اقتصادي ستونزو له کبله یې د خپلو سترګو د درملنې وس نه درلود.
د دغه روغتیایي ډلې مسوولین وایي، تر دې دمه یې تر دوه زره پورې د هغو ناروغانو درملنه کړې چې د سترګو لید کې یې ستونزې درلودې.
د یادې روغتیایي ډلې مشر محمد يوسف عثماني وايي، په دې ولايت کې په زيات شمير داسې ناروغان شته چې د سترګو ناروغي لري او په خبره يې چې دوی د مجهزې ټکنالوژۍ په مرسته د يادو کسانو درملنه کوي.
نوموړی زیاتوي، هره ورځ دوی ته د مرکز ترینکوټ او ولسواليو څخه تر ۳۵۰ هغه کسان مراجعه کوي چې د سترګو له ناروغیو شکایت لري.
هغه زياته کړه: «د ورځې د ۳۰۰ څخه تر ۳۵۰ پورې کسانو OPD کوو تراوسه مو ۲۰۰۰ کسان کتلي مختلفې ناروغۍ دي موسمي ناروغۍ زياتې دي.»
هغه ناروغان چې دغه وړیا مرکز ته د خپلو سترګو د درملنې په موخه راغلي وایي، د اقتصادي ستونزو له امله یې نشول کولای چې خپله درملنه وکړي.
د دغو ناروغانو له ډلې څخه يو هم عبدالعزیز دی وایي، شاوخوا ۱۵ کاله يې په تور تيارو کې تيرې کړي او اوس يې د سترګو درملنه شوې ده.
هغه د دغه روغتيايي ټيم څخه خوښ دی او د طالبانو له مسوولینو غوښتنه کوي چې په دايمي ډول دې ارزګان کې د سترګو د ډاګټرانو د نشتون ستونزه حل کړي.
اخوا ارزګان کې د طالبانو د روغتیا ریاست مسوولین بیا وایي، چې په دې ولایت کې د سترګو هیڅ متخصص ډاکټر شتون نلري چي له امله یې دوی اړ شوي چي د خیریه بنسټونو څخه په همکارۍ له نورو ولایتونو څخه په وقفه یي ډول یو ټیم راوغواړي تر څو دلته د خلکو درملنه وکړي.
د دې ولايت د عامې روغتيا ریاست مرستيال فتخ خان له نورو روغتيايي نړيوالو سازمانونو څخه هم غوښتنه کوي چې دې ولايت کې دې په روغتيايي برخه کې همکاري وکړي.
د هیواد په لېرې پرتو سیمو کې تل خلک شکایت کوي چې دوی کافي روغتیايي خدماتو ته د نه لاسرسی له کبله د بېلابېلو ناروغیو کړیږي.
