اطلاعات روز: د امريکا د استازو مجلس د بهرنيو اړيکو د کميټې رييس مايک مک کال وايي، چې له افغانستانه د دې هيواد د وتلو په اړه يې د امريکا د بهرنيو چارو وزارت له ځينو اوسنيو او پخوانيو چارواکو ليکلې مرکې غوښتې دي.
د سي ان ان د راپور له مخې، مايک مک کال په پرونۍ (يکشنبه، ۲۴ د غویي) خپرې شوې اعلاميې کې د پنځو چارواکو د مرکې غوښتنه کړې ده.
ده ويلي، چې د څېړنو له لارې دې پايلې ته رسېدلی چې دا پنځه کسان له افغانستانه د بايډن د حکومت د ويرجنې وتنې د څرنګوالي په اړه مهم معلومات لري.
مايک مک کال زياته کړې: «د شواهدو د راټولولو په دوام کميټه د حکومت له هغو پخوانيو او اوسنيو چارواکو سره مرکې کوي چې [له افغانستانه] د وتلو د برنامې په پلانولو کې داخل و.»
دا غوښتنې تر هغه وروسته کېږي چې مک کال د دې هيواد د بهرنيو چارو وزیر آنټوني بلينکن ګواښلی و چې که له افغانستانه د امريکا د وتلو په تړاو د محرمانه ټلګراف په اړه امريکايي قانون جوړوونکو ته وضاحت ورنه کړي «کنګرې ته د سپکاوي» له تور سره به مخ شي.
مک کال له افغانستانه د امريکا د وتلو په اړه څېړنې پېل کړې دي.
جمهوريت غوښتونکي او ډيموکراټان وايي، چې د هغو بې نظمه عملياتو په اړه هيڅ بشپړ راپور نه دی تيار شوی چې له کبله يې د کابل په هوايي ډګر کې ۱۳ امريکايي نظاميان ووژل شول.
