اطلاعات روز: تېره ورځ د پاکستان په پلازمینه اسلام اباد په يوه محکمه کې د عمران خان تر نيول کېدو وروسته د عمران خان پلويان په ټول هيواد کې له پوليسو سره نښتي او ورسره هم مهاله ګډوډۍ زور اخیستی دی.
ټاکل شوې چې ۷۱ کلن عمران خان به نن (چهارشنبه، ۱۰ د غویي) محکمې ته وړاندې شي، تر څو يې ۱۴ ورځې نور هم په زندان کې وساتي.
قهرېدلو لاريونوالو په لاهور کې د پوځ د يوه جنرال اوسېدنځای ته د اور تر اچولو وروسته د عمران خان ګوند تحريک انصاف پر خپلو پلويانو غږ کړی چې سولييز پاتې شي.
عمران خان د ګڼو تورونو په تړاو محکمې ته حاضرېږي، خو تېره ورځ نيمه پوځي ځواک د ملي احتساب د ادارې په ملاتړ په محکمه کې دننه ونيوه.
تر دې نيونې وروسته په هيواد کې سياسي ګډوډي خپره شوه او تاوتريخوالی پېښ شو چې له امله يې د پاکستان په سويل لوېديځ ښار کويټه کې يو کس وژل شوی او د هيواد په نورو برخو کې ګڼ نور کسان ژوبل دي.
د عمران خان پلويانو پلازمينې اسلام اباد ته نږدې د پوځ پر مرکز بريد وکړ خو اصلي ودانۍ ته ونه رسېدل. نورو لاريوانوالو په لاهور کې د لومړي وزير پر مېشت ځای بريد وکړ خو پوليسو يې مخه ونيوله. همدا راز، لاريونوالو پر پوځي ګاډو او پوځيانو بريدونه کړي او په ډنډو يې وهلي.
د عمران خان د ګوند مرستيال مشر شاه محمود قريشي نن پر خپلو پلويانو غږ کړی چې «عامه تأسيسات مه ورانوئ، پر دفترونو بريد مه کوئ.» ده ويلي چې په ستره محکمه کې به د عمران خان د زنداني کېدو قضيه ننګوي. ده پر خپلو پلويانو غږ کړی چې سولييز پاتې شئ.
د همدې شخړو پر مهال د پاکستاني ارتباطاتو ادارې د ټويټر په شمول ټولنيزې رسنۍ تړلې دي. همدا راز حکومت په اسلام اباد او نورو ښاورنو کې انټرنيټي خدمات هم قطع کړي دي.
د تاوتريخوالي له پراخېدو سره د بېلابېلو هيوادونو ډيپلوماټان او عامه خلک په کورونو کې پاتې شوي. په اسلام اباد کې د متحده ایالاتو سفارت د چهارشنبې د ورځې ټولې چارې لغو کړي او په پاکستان کې برتانوي سفارتي ماموريت د نوري ګډوډۍ خبرداری ورکړی.
