اطلاعات روز: د لوګر په مرکز پل عالم او څرخ ولسوالۍ کې په دوو جلا پیښو کې یو ماشوم او یو ۳۳ کلن سړی وژل شوي دي.
په دغه ولایت کې یوې ځايي سرچینې اطلاعات روز ته وویل، چې نن (چهارشنبه، ۱۳ د غویي) سهار مهال په څرخ ولسوالۍ کې د ځمکې په سر د دوو کورنیو ترمنځ د رامنځته شوې شخړې پر مهال یو ۳۳ کلن کس وژل شوی او یو بل ټپي دی.
سرچینې په دې اړه نور جزیات نه دي ورکړي چې دغه کس د څه په وسیله وژل شوی، خو لوګر، پکتیکا، پکتیا او خوست کې ډېر کله د ځمکې، اوبو او غره په سر ځینې وخت قومي ستونزې په شخړو بدلیږي چې ډېر کله پکې ښکېلو غاړو ته مرګ، ژوبله هم اوړي.
د یو بل خبر له مخې چې نن سهار د دغه ولایت د مرکز پل عالم اړوند په «التمور» سیمه کې د ښوونځي یو زده کوونکی له غره را لوېدلی او خپل ژوند یې له لاسه ورکړی دی.
یوې سرچینې وویل، چې یاد زده کوونکي د جوزار ښوونځي په نوم په شپږم ټولګي کې زده کړې کولې، چې د «پښې» بوټو د راټولولو لپاره غره ته ختلی و.
د لوګر ولایت لپاره د طالبانو د امنیې قومندانۍ مسوولینو په څرخ ولسوالۍ کې د رامنځته شوې پېښې پخلی کړی، خو په التمور سیمه کې بیا د وژل شوي زده کوونکي په اړه د دغه ولایت د طالبانو د پوهنې ریاست مسوولینو څه نه دي ویلي.
