اطلاعات روز: په افغانستان کې د ملګرو ملتونو د بشري حقونو ځانګړي راپورچي د رسنيو د ازادۍ په نړيواله ورځ له طالبانو غوښتي چې د ازادو، زیات پلویو (کثرت ګرا)، خپلواکو او پراخبنسټو رسنيو ته درناوی وکړي.
ده په يوه ټويټ کې ليکلي، چې د افغانستان د رسنيو او په ځانګړي توګه د هغو ورځپاڼه ليکونکو ښځو درناوی کوي چې له ټولو بنديزونو او ځاني خطرونو سره – سره رسنيز کار ته دوام ورکوي.
بېنټ ليکلي: «زه له طالبانو غواړم چې د ټولو افغانانو د يوه حق په توګه بايد د يوې ازادې، زیات پلوې، خپلواکې او پراخبنسټې رسنۍ درناوی وکړي.»
دا په داسې حال کې ده چې طالبانو پر رسنيو او خبريالانو جدي بنديزونه لګولي دي.
د افغانستان د ازادو رسنيو ملاتړي بنسټ چې «نی» نومېږي د رسنيو د نړيوالې ورځې په مناسبت په خپل پيغام کې ويلي، چې په دې هيواد کې د رسنيو ازاد فعاليت په يوه ننګونه بدل شوی دی.
دې بنسټ ټينګار کړی چې په افغانستان کې بايد د رسنيو او خبريالانو ازاد فعاليت د يوه بشري حق په توګه تضمين شي.
دې بنسټ زياته کړې چې په افغانستان کې تر نيمايي زياتې رسنۍ د اقتصادي ستونزو او په هيواد کې د شته ستونزو له وجې له فعاليته لوېدلې دي او تر ۶۵ سلنې زيات خبريالان او رسنيز کارکوونکي بېکاره شوي دي.
نی ويلي: «په اوسنيو شرايطو کې د رسنيو ازاد فعاليت، د بيان د ازادۍ تمثيل، اطلاعاتو ته لاسرسی او د خبريالانو ځاني او رواني مصئونيت په اندېښمنوونکي حالت کې دی او د دې وضعيت دوام په اوږدمهال کې د افغانستان د ازادو رسنيو لپاره ملا ماتونکی کېدای شي.»
