اطلاعات روز: د سویس ملګرو ملتونو د عمومي منشي د مرستيالې آمينې محمد څرګندونو ته په غبرګون کې د سويس په جينوا کې د افغانستان استازولۍ د دې سازمان له چارواکو غوښتي چې «هوښيار او مسوولیت منونکي دې وي».
په جينوا کې د ملګرو ملتونو په دفتر کې د افغانستان استازولۍ نن (پنج شنبه، ۳۱ د وري) په يوه ټويټ کې ليکلي: «د آمينې محمد په شمول د ملګرو ملتونو لوړپوړي چارواکي بايد د هغه منشور او ارزښتونو د ساتونکو په توګه هوښيار او مسووليت منونکي وي چې په تېرو ۷۵ کلونو کې يې وده کړې. د افغانستان تاريخ د ۲۰۲۱ کال د اګست له ۱۵مې نه دی پېل شوی. غير عادي عادي مه ښکاره کوئ. د افغانستان وګړي او نړۍ تاسو څاري.»
د ملګرو ملتونو د عمومي منشي مرستيالې امينې محمد په پرينسټون پوهنتون کې د يوې غونډې پر مهال ويلي، چې دا سازمان تکل لري تر څو په افغانستان کې د وضعيت د لا خرابيدا د مخنيوي لپاره په راتلونکو ورځو کې يوه غونډه راوبولي او د طالبانو د رسميت پېژندنې په اړه خبرې وکړي.
د نوموړې دا څرګندونې په افغانستان کې دننه او دباندې له پراخ غبرګون سره مخ شوې او د دې لامل شوې چې د ملګرو ملتونو وياند اسټيفان دوجاريک په يوه خبري غونډه کې وويل چې دا سازمان د طالبانو لپاره لابي نه کوي.
ده په دوحه کې د آنټونيو ګوتريش په کوربتوب د راتلونکو ورځو پر مهال د کېدونکې غونډې هدف د افغانستان له وضعيت سره د مقابلې په موخه د يوې واحدې تګلارې موندل او د بې ثباتۍ مخنيوی ياد کړ.
په افغانستان کې د طالبانو پر واکمنۍ تر يوه نيم کال زيات وخت اوړي، خو لا هم هيڅ هيواد د دې ډلې حکومت په رسميت نه دی پېژندلی.
