اطلاعات روز: د ۲۰۲۳ کال پر مهال د اسټراليا د سولې او اقتصاد موسېسې (آی اپی) د نړيوال تروريزم شاخص ښيي چې افغانستان او پاکستان په سویلي اسيا کې د تروريستي پېښو تر ټولو لوړه کچه لري.
د دې شاخص لنډيز پرون (چهارشنبه، ۳۰ د وري) د نيپالۍ ورځپاڼې په ويبپاڼه هيمالين کې خپور شوی دی، چې په وينا يې د وروستيو کلونو پر مهال په افغانستان کې د داعش او طالبانو ظهور او همدا راز د پاکستان په بلوچستان کې د وسله والو ډلو ظهور تشديد شوی دی.
د افغانستان او پاکستان په اړه پر هيمالين ويبپاڼه نور جزييات نه دي خپاره شوي.
د اسټراليا د سولې او اقتصاد موسېسې په راپور کې همدا راز راغلي چې نيپال د ۴.۱۳ نومرو په لرولو سره په ۳۶ درجه کې دی او د تروريزم د منځنۍ کچې له زيان سره مخ دی.
له دې راپور سره سم، نيپال د تروريستانو لپاره د خوندي پناهځای په توګه د ناوړې ګټې اخيستنې له خطر سره مخ دی.
خو په دې راپور کې ويل شوي، چې که څه هم په نپيال کې هيڅ تروريستي سازمان نشته، خو کوم څه چې په دې هيواد کې د تروريزم په توګه مطرح شوي د څېړنې وړ موضوع ده.
له دې راپور سره سم، هند، بنګلاديش، سريلانکا او مالديف هم تر يوې اندازې تروريزم تجربه کړی دی.
افغانستان او پاکستان په داسې مهال کې د لړليک سرته راځي چې له تېر يوه نيم کال راهيسې طالبان پر افغانستان واکمن دي او په همدې موده کې د پاکستاني پوځ او پوليسو پر خلاف د پاکستاني طالبانو بريدونه هم زيات شوي دي.
