اطلاعات روز: د ننګرهار مرکز جلال آباد ښار کې د آسیا په کچه ۳۰ جریبه ځمکه کې د دیني او عصري علومو ستر کمپلېکس جوړیږي.
د ننګرهار ولایت لپاره د طالبانو د رسنیو له دفتره نن (دوشنبه، ۲۸ د وري) په خپره شوې خبرپاڼه کې راغلي، چې د «دارالعلوم اسلامیه محمدیه» په نوم مدرسه چې د جلال آباد ښار شپږمې ناحیې په لوړه برخه کې موقعیت لري د دیني او عصري زده کړو کمپلېکس لپاره ځانګړې شوې ده.
خبرپاڼې زیاته کړې چې په شاوخوا ۳۰ جریبه ځمکه کې جوړېدونکې دا مدرسه به د راتلونکو پنځو کالو په ترڅ کې د آسیا په کچه یو کم ساری دیني او عصري کمپلېکس وي.
دې مدرسه کې د طب، انجینرۍ، ژورنالېزم، کمپیوټر ساینس او نورو عصري علومو لپاره هم ځای ورکړل شوی دی.
د خبرپاڼې د معلوماتو له مخې چې یو مجهز روغتون، پوهنتون او لېسه به هم پکې شتون ولري.
خبرپاڼې ننګرهار کې د طالب چارواکو له قوله ویلي، چې د یاد کمپلېکس زده کوونکي به یې د ټولو اسانتیاوو څخه برخمن وي او په ډېره منظمه بڼه به د دیني او عصري علومو په ګاڼه سمبال او ټولنې ته به د خدمت لپاره وړاندې شي.
په ټولنیزو رسنیو کې هم افغانانو د یاد اقدام هرکلی کړی او له طالبانو یې غوښتي چې د دې سره سره دې د نجونو پرمخ د ښوونځیو دروازې هم پرانیزي.
