اطلاعات روز: د افغانستان په چارو کې د امريکا ځانګړی استازی توماس وېسټ وايي، چې په دوحه کې یې د افغانستان د فعالينو په يوه غونډه کې يې ګډون کړی او د دې غونډې ګډونوالو د خبرو له لارې یې د افغانستان د شخړې د هوارولو ملاتړ کړی او له وسله والې مبارزې سره يې مخالفت ښودلی دی.
نوموړي نن (شنبه، ۲۶ د وري) پرلپسې ټويټونو کې ليکلي چې د امريکا د متحدينو او کليدي شريکانو د يوه پلاوي په مشرۍ يې د قطر په پلامېنه دوحه کې «د افغانستان راتلونکي فکر فورم» په نوم غونډه کې ګډون کړی دی.
وېسټ ليکلي، چې د افغانستان د ښځو او سړو دا بافهمه ترکيبي انجمن بېلابېلي مخينې لري. د ده په وينا د دې انجمن په جوړښت کې اقتصاد پوهان، د بشري حقونو فعالان، پخواني وزيران او د قبايلو مشران شامل دي او ډېری کسان يې په غونډه کې د ګډون لپاره له افغانستانه راغلي و.
ده ليکلي: «ما د طالبانو د چلند په اړه هم ملاتړ وليد او هم مې غندنې واوريدې او هم مې له ننګونو سره د نړيوالې ټولنې د تعامل د څرنګوالي په اړه بېلابېلي سپارښتنې واورېدې. خو هر افغان ګډونوال د خبرو-اترو ملاتړ وکړ او د هيواد د ستونزو د حل کولو لپاره يې له وسله والې مبارزې سره مخالفت وښود.»
د امريکا ځانګړي استازي هيله ښودلې چې د دې غونډې ګډونوال به خپل پيغامونه طالبانو، د افغانستان نورو رهبرانو او د نړيوالې ټولنې ذينفع غړو ته ورسوي.
ده په قطر کې له قطري چارواکو سره هم ليدلي او د افغانستان په اړه يې ورسره خبرې کړې دي.
ټاکل شوې چې توماس وېسټ به متحده عربي اماراتو او ترکيې ته هم سفر وکړي او د دې دوو هيوادونو له چارواکو او په تبعيد کې د افغانستان له مدني ټولنې، سياسي رهبرانو، خبريالانو او د بشري حقونو له فعالانو سره وويني او خبرې به ورسره وکړي.
