اطلاعات روز: نیمروز کې یوه ځایي سرچینه ادعا کوي، چې په دې ولایت کې د طالبانو له لوري د داعش پر پټنځای د عملیاتو په ترڅ کې سخته نښته شوي چې له امله یې ۱۰ داعشیان او درې طالبان وژل شوي دی.
سرچینه زیاتوي، طالبانو دغه عملیات تېره شپه (دوشنبه، ۱۴ د وري) ناوخته د زرنج ښار د «معصوم اباد» نومې سیمه کې ترسره کړي دي.
د دغې سرچینې په وینا، د طالبانو له لوري د داعش وسله والو پر پټنځای د عملیاتو د پېل سره هم مهاله نښته پېل شوه چې نږدې یو نیم ساعت یې دوام درلود.
سرچینه ادعا کوي، چې د جګړې په ترڅ کې ۱۰ داعش وسله وال او درې طالب ځواکونه وژل شوي دي.
موږ هڅه وکړل چې د یادې نښتې په اړه نیمروز کې د طالبانو ولایتي چارواکو نظر هم ولرو خو ولایتي مسوولینو تراوسه زموږ اړیکې ته ځواب نه دی ویلی.
دغه راز اطلاعات روز ته په استول شویو ویډیوګانو کې د ډزو غږونه اوریدل کېږي او د جګړې په ډګر کې د ځینو کسانو جسدونه هم لیدل کېږي.
اطلاعات روز په خپلواکه توګه دا نشي ویلی چې یاد جسدونه د کوم لوري غړي دي.
په داسې حال کې چې طالبان ادعا کوي چې داعش په افغانستان کې ځپل شوی او کوم جدي ګواښ نه دی خو په دې وروستیو میاشتو کې د دوی ترمنځ نښتې زیاتې شوي دي.
تازه طالبانو ادعا کړې چې تېره شپه یې په بلخ ولایت کې د داعش پر یوه پټنځای د عملیاتو په ترڅ کې شپږ داعشیان وژلي دي.
