اطلاعات روز: هرات کې ځايي سرچينې وايي، چې د طالبانو د امر بالمعروف او نهی عن المنکر ادارې محتسبين له ښار څخه په وتونکو دروازو کې ولاړ دي او تفريحي ځايونو ته د کورنيو د تګ مخه نيسي.
سرچينو نن (سېشنبه، ۱ د وري) اطلاعات روز ورځپاڼې ته وويل، چې د طالبانو د امر بالمعروف او نهی عن المنکر اداره له سهاره تر اوسه د هرات ښار په «کمرکلاغ»، «پل هاشمی»، «شيدايي» او «پل مالان» دروازو کې ولاړ دي.
د سرچينو په وينا، د طالبانو دا کارمندان هغه موټر بيرته ګرځوي چې کورنۍ پکې وي او تفريح ځايونو ته د تلو اراده لري.
سرچينې زياتوي، چې د طالبانو د امر بالمعروف محتسبين خلکو ته وايي، چې د نوروز لمانځل حرام دي او په دې ورځ ميله کول ګناه لري. دوی همدا راز وايي چې خلک کولای شي په نورو ورځو کې تفريح ته ولاړ شي.
طالبان د نوروز لمانځل حرام ګڼي او د نوروز جشن يې د افغانستان له کليزې هم ايستلی دی.
د طالبانو د امر بالمعروف او نهی عن المنکر مامورينو د دايکندي ولايت له اوسېدونکو سره په وروستۍ غونډه کې د نوي لمريز کال يا نوروز لمانځل «ناروا» اعلان کړي.
د طالبانو تر واکمنېدو وړاندې د لمريز کال په لومړۍ ورځ به د نوروز جشن و او په رسمي توګه به په کابل او د بلخ په شمول په شمالي ولايتونو کې لمانځل کېده.
نوروز يو لرغونی جشن دی چې د ايران، تاجکستان، اذربايجان او د نړۍ د نورو ځايونو په مشترکه تمدني حوزه کې لمانځل کېږي.
