اطلاعات روز: د ولسمشر لومړی مرستیال امرالله صالح وایي، طالبان نوي ځوانان او ماشومان د دیني زده کړو په پلمه له بې وزله کورنیو ځان سره وړي، خو هلته یې ذهنونه ور پرېمینځي او ځانمرګو بریدونو ته یې چمتو کوي.
ښاغلي صالح د نن (شنبه، ۴ سلواغې) سهار شپږ نیمو بجو له غونډې پر خپل فیسبوک خپور شوي راپور کې له کورنیو غوښتي چې د دیني زده کړو په نوم دې خپل ماشومان کوم چا ته نه تسلیموي.
نوموړي لیکلي: «طالبان د دیني زده کړو په نوم نوي ځوانان او ماشومان له بې وزله کورنیو ځان سره وړي او بیا یې ذهنونه پرېمینځي او ځانمرګو ته یې هڅوي.»
امرالله صالح وایي، دغه زده کړې ډېری په پاکستان او ځینې وخت د طالبانو کنټرول لاندې سیمو کې کیږي.
صالح په ادامه کې لیکلي چې طالبانو ته هغه څه چې هېڅ ارزښت نه لري هغه د انسان ژوند دی. ده ویلي د کابل له ملي امنیته یې غوښتي، څو د هغه ځوانانو نوملړ چې د طالبانو تر تبلیغاتو لاندې راغلي او بیا یې ترې ځانمرګو بریدونو کې ګټه اخیستې، خپور کړي.
د ولسمشر مرستیال دغه راز لیکلي چې پاکستان یوازینی هېواد دی چې طالبانو ته له غربه ډېر امتیاز غواړي. د ده په وینا په داسې حال کې چې طالبانو سره د امریکا د دوحې تړون کې دې ډلې ته د زیات امتیاز پر ورکولو افغانان او ان د نړۍ هېوادونو نااړین بللي، خو پاکستان ورته لا هم ډېر امتیاز غواړي.
نوموړي په وروستیو کې لیکلي چې د افغانستان دولت د سولې پروسې مخته وړلو او له یوې باعزته لارې یو حللارې ته رسېدو ته ژمن دی او په ورته مهال د جمهوریت حاکمیت ساتلو او لاسته راوړنو ساتلو لپاره په سخته او نرمه بڼه د ساتلو مسوولیت ته متوجه یو.
طالبانو تر اوسه د ولسمشر لومړي مرستیال دغو څرګندونو ته کوم غبرګون نه دی ښودلی.
