اطلاعات روز: د طالبانو د بهرنيو چارو وزارت وايي، چې د ترکيې په استانبول کې د افغانستان قونسلګرۍ ته لېږل شويو ډيپلوماټانو په کار پېل کړی دی.
دې وزارت د ډيپلوماټانو د هويت او د دندې په اړه څه نه دي ويلي، خو تېره شپه د دې ډلې د بهرنيو چارو وزارت يوه چارواکي ادعا کړې وه چې په استانبول کې د افغانستان قونسلګرۍ د طالبانو ډيپلوماټ ګلمت خان ته سپارل شوې ده.
په انقره کې د افغانستان سفارت او د ترکيې دولت د طالبانو د ډيپلوماټ د فعاليت په اړه څه نه دي ويلي.
په عين حال کې ځينو سرچينو له رسنيو سره په خبرو کې طالبانو ته د استانبول د قونسلګرۍ سپارل کېدل رد کړي دي.
د طالبانو د بهرنيو چارو وزارت د خبرپاڼې په وينا چې نن (سېشنبه، ۹ د کب) خپره شوې، وايي چې د دې وزارت ډيپلوماټ تېره ورځ د استانبول په قونسلګرۍ کې په کار پېل کړی دی.
دې وزارت زياته کړې، چې هڅه کوي چې سياسي استازولۍ له ډيپلوماټيک فعاليت سره – سره له هيواده بهر کډوالو ته قونسلي خدمات هم وړاندې کړي.
د طالبانو د بهرنيو چارو وزارت ویلي، سره له دې چې له جمهوري ترکيې سره اړيکې ځانګړی ارزښت لري، خو په استانبول کې د زرګونو افغان وګړو شتون نور هم د دې ښار ارزښت زياتوي.
د طالبانو ډيپلوماټانو تېره ورځ په تهران کې هم په کار پېل وکړ.
طالبانو په تهران کې فضل محمد حقاني د خپل سفارت شارژدافير ټاکلی دی. دا ډله وايي چې اووه نوي ډيپلوماټان يې ايران ته لېږلي دي.
تر دې وړاندې هم د سيمې څو هيوادونو د طالبانو ډيپلوماټان منلي دي.
دا په داسې حال کې ده چې تر اوسه هيڅ هيواد هم طالبان د افغانستان د حکومت په توګه په رسميت نه دي پېژندلي.
په بهر کې د افغانستان ډېری سفارتونه د پخواني حکومت د ډيپلوماټانو په واک کې دي.
د ترکيې په انقره کې هم د افغانستان سفارت د پخواني حکومت د ډيپلوماټ امير محمد رامين په واک کې دی، خو ويل کېږي چې دا ډيپلوماټ له طالبانو اوامر اخلي.
رامين د طالبانو د بهرنيو چارو وزارت د سرپرست امير خان متقي کوربتوب کړی و. متقي هم يو ځل ويلی و چې په ترکيه کې د افغانستان سفارت له کابله هدايات اخلي.
