اطلاعات روز: د طالبانو د بهرنيو چارو وزارت وايي، چې په تهران کې يې د افغانستان سفارت ته اووه نوي ډيپلوماټان لېږلي دي.
د دې وزارت په وينا، په تهران کې د افغانستان د سفارت لپاره د دې ډلې شارژدافير فضل محمد حقاني نن (دوشنبه، ۸ د کب) د سفارت چارې په لاس کې اخلي.
د طالبانو د بهرنيو چارو وزارت مرستيال وياند حافظ ضيا وايي، چې دې وزارت په دې موخه چې د سفارت په خدماتو کې ځنډ رانشي، اووه نوي ډيپلوماټان لېږلي دي.
هغه ډيپلوماټان، اتشې او سيمهييز کارکوونکي چې د افغانستان د تېر حکومت پر مهال ټاکل شوي و، پرون يې دا سفارت تخليه کړ.
د ايران د بهرنيو چارو وزارت په تهران کې طالبانو ته د افغانستان د سفارت سپارل د افغانستان په کورنيو چارو پسې تړلې چاره ګڼلي او ويلي يې دي چې په دې موضوع کې يې «مداخله» نه ده کړې.
ايرنا خبري اژانس تېره شپه د ايران د بهرنيو چارو وزارت د عمومي اړيکو په وينا راپور ورکړی و چې دې وزارت په تهران کې د افغانستان د سفارت د «تحويل او داخلي بدلونونو» په تړاو شوې ادعاوې رد کړې دي.
د ايرنا په وينا، د ايران د بهرنيو چارو وزارت ويلي: «په تهران کې د افغانستان د سفارت تحويل او پکې بدلون (له افغانستان سره تړلې) داخلي چاره ده او د ايران د اسلامي جمهوريت د بهرنيو چارو وزارت په ياده موضوع کې هيڅ ډول مداخله نه ده کړې.»
تر دې وړاندې د سيمې څو نورو هيوادونو هم د طالبانو ډيپلوماټان منلي دي.
دا په داسې حال کې ده چې هيڅ هيواد هم طالبان د افغانستان د حکومت په توګه په رسميت نه دي پېژندلي.
