اطلاعات روز: د خوست ولایت په تڼیو، دوه منده او نادرشاه کوټ ولسوالیو کې د درې جلا پېښو پر مهال درې کسان وژل شوي او دوه نور ټپیان دي.
په دغه ولایت کې ځايي سرچینې وايي، چې لومړۍ پېښه تېره ورځ (چهارشنبه، ۳ د کب)د تڼیو په ولسوالۍ کې رامنځته شوې چې له امله یې یو ۲۲ کلن زده کوونکی وژل شوی دی.
سرچینه زیاتوي، چې دغه زده کوونکي په یو خصوصي ښوونځي کې زده کړې کولې او د ځمکې په سر د وسله والې شخړې پر مهال په ډزو وژل شوی دی.
ورته مهال په دوه منده ولسوالۍ کې هم یو کس د قومي شخړې پر مهال وژل شوی او دوه نور پکې ټپیان شوي دي.
یوې ځايي سرچینې چې نه یې غوښتل نوم یې یاد شي اطلاعات روز ته وویل، چې پېښه غرمه مهال د «بیکیو او بیرخېلو» قومونو ترمنځ د قومي شخړې په ترڅ کې رامنځته شوې ده.
د سرچینې په حواله چې په دغه پېښه کې یو کس وژل شوی او دوه نور ټپیان دي، چې وروسته د طالبانو د امنیتي ځواکونو له لوري یاده شخړه کنټرول شوې ده.
په دې ولایت کې د وژنو پر دوام په همدې ورځ په نادرشاه کوټ ولسوالۍ کې هم د شخصي دښمنۍ له امله یو کس وژل شوی دی، ځايي سرچینې وايي، چې دا پېښه هغه مهال رامنځته شوه چې په دغه کس یو وسله وال ډزې وکړې.
تر اوسه د رامنځته شویو پېښو په اړه د خوست ولایت لپاره د طالبانو امنیتي مسوولینو رسنیو ته څه نه دي ویلي.
د ځمکې، غره او شخصي دښمنیو پر مهال په دغه ولایت کې په تېرو ۱۰ ورځو کې ۵ کسان وژل شوي او تر ۸ نور ټپیان دي، چې دې حالت د خوست اوسېدونکي اندېښمن کړي او د طالبانو له امنیتي ادارو یې د مخنیوي په برخه کې د کوټلو ګامونو اخیستو غوښتنه کوي.
