اطلاعات روز: د طالبانو د مالیې وزارت وايي، چې د ۱۴۰۱ مالي کال په ۱۱ میاشتو کې یې له ګمرکونو څخه ۱۰۰ میلیارده افغانۍ عواید راټول کړي دي.
دې وزارت نن (دوشنبه، ۱ د کب) ادعا کړې چې دومره عوايد د افغانستان د ګمرکونو په تاريخ کې بې مخينې دي.
د ماليې وزارت په خبرپاڼه کې راغلي چې د دې ډلې تر واکمنۍ وړاندې د ګمرکونو کلنی عايد تر ۷۲ ميليارد افغانۍ زيات نه و.
دې وزارت زياته کړې، چې که څه هم د طالبانو د حکومت له لوري پر لومړنيو خوراکي موادو ګمرکي تعرفه ۶۸ سلنه کمه شوې خو، بيا هم د مالي کال تر ختمېدو وړاندې ګمرکي عوايد ۱۰۰ ميليارده افغانيو ته رسيدلي دي.
د طالبانو ماليې وزارت ادعا کړې، چې د عوايدو بې مخينې زياتوب ښيي چې په ګمرکونو کې مسلکي او ژمن کادرونه ټاکل شوي، د فساد کچه صفر ته رسيدلې او په ګمرکي چارو کې بشپړه روڼتيا را منځته شوې ده.
د تېر حکومت پر مهال په ګمرکونو کې د فساد ادعادې يوه جدي ننګونه وه. د پخواني حکومت د ماليې وزارت سرپرست خالد پاينده يو ځل ويلي و، چې هره ورځ د ګمرکونو له اوو تر اتو ميليونو ډالر عايد د فساد له وجې ورکېږي.
د يادونې وړ ده چې د افغانستان پخوانی حکومت پر بهرنيو مرستو متکي و، خو طالبان وايي، چې سږ کال يې بودیجه له داخلي عوايدو جوړه کړې.
د طالبانو ماليې وزارت د ۱۴۰۱ مالي کال ټوله بودیجه ۲۳۱ ميليارد افغانۍ ټاکلې وه چې له دې څخه ۲۰۳ ميليارد افغانۍ عادي بودیجه وه او ۲۷،۹ ميليارد افغانۍ پرمختيايي بودیجه وه.
