اطلاعات روز: د طالبانو تر مديريت لاندې د اوسپنې پټلۍ اداره وايي، چې د هرات– خواف اورګاډي پټلۍ له لارې به ژر د توکو لېږد پېل شي.
د دې ادارې په وينا، د افغانستان او ايران پلاوو د غوريان او روزنک تمځايونو په ګډون د هرات–خواف بيلابيلې برخې کتلې دي.
د اوسپنې پټلۍ ادارې په خبرپاڼه کې راغلي چې د افغانستان له لوري د غوريان تمځای يې له ټولو تجهيزاتو سره ايران ته سپارلی تر څو ايرانی لوری خپل تخنيکي دفترونه فعال او د هرات–خواف د اورګاډي پټلۍ پاتې نيمګړتياوې بشپړې کړي.
د خبرپاڼې له مخې، ايراني لوري په ليکلي ډول ژمنه کړې چې د افغانستان د اورګاډي پټلۍ ادارې په مرسته به د هرات–خواف اورګاډي پټلۍ تر وري میاشتې وړاندې لوکنوموتيو، تګ–راتګ ته چمتو کړي او په پام کې ده چې لومړنی اورګاډی به له دې لارې افغانستان ته راشي.
د ايران د اورګاډي د کنسرسیوم د پراختيا مدير ويلي: «هڅه کوو چې د روان کال تر پای ته رسېدو وړاندې هرات ته لېږد پېل کړو.»
د هيواد د اورګاډي پټلۍ ادارې ويلي، چې هڅه کوي د هرات – خواف اورګاډي له لارې د لېږد تر پېل وړاندې په روزنک تمځای کې ټولې اړينې اسانتياوې برابرې کړي.
د دې ادارې په وينا، چې همدا اوس هم د ډیری بندري ادارو لکه نفت او ګاز، د سټنډرډ ملي اداره، افغان پست او ټرانسپورټ وزارت لپاره فعال موقعيتونه مشخص شوي او هڅه کېږي چې د څو ورځو په بهير کې ټولې بندري ادارې فعالې شي.
د هرات – خواف د اورګاډي لار چې ۲۲۶ کيلومټره اوږده ده، افغانستان د ايران د اورګاډي له پټلۍ سره نښلوي. د دې پټلۍ ۷۷ کيليومټره په ايران او ۱۴۹ کيلوميټره يې په افغانستان کې جوړه شوې ده.
د ايران دولت د دې پټلۍ درې برخې جوړي کړې دي. څلورمه برخه د افغانستان په داخل کې پر دوو برخو ويشل شوې وه او د لومړۍ برخې اجرايوي کارونه په ۱۳۹۹ کې پېل شوي و؛ خو ويل کېږي چې تر وروستيو بدلونونو وروسته يې چارې دريدلې وې او يو شمير تجهيزات تخريب شوي هم و.
يو څه وخت وړاندې د طالبانو د اورګاډي پټلۍ ادارې د هرات – خواف د اورګاډي د تاسيساتو رغولو پر مهال ويلي و چې د دې پټلۍ ځينې وسايل غلا شوي او يا هم تخريب شوي دي.
