اطلاعات روز: د فنلینډ د کډوالو ادارې اعلان کړی چې په افغانستان کې د طالبانو تر واکمنېدو وروسته د ښځو د وضعيت «خرابیدو» له کبله افغان ښځو او نجونو ته پناه ورکوي.
د هلسينکيټايمز له راپور سره سم، د فنلینډ کډوالو ادارې د افغان پناه غوښتونکو غوښتنليکونو ته د رسيدګۍ تګلارې نوې کړې دي.
د فنلینډ د کډوالو وزارت د پناه ورکولو د څانګې مديرې آنتي لهتينن ويلي، چې يوازې جنسيت به د پناه ورکولو لپاره بسنه کوي، په داسې حال کې چې دا پخوا په ګڼو اړخونو کې يو اړخ د پرېکړي پر مهال به پام کې نيول کېده.
دې ويلي، چې دا يو له وړاندې اخيستل شوی ګام دی چې په افغانستان کې د ښځو بد حالت ته په پام سره د فنلانډ د کډوالو ادارې پورته کړی دی.
له دې سره – سره، د فنلینډ کډوالو ادارې د هزاره وګړو غوښتنليکونو ته د رسيدګۍ تګلارې هم نوې کړې دي.
هلسينکيټايمز ليکلي، چې دا لارښودونه د اروپا د کډوالۍ شورا (EUAA) راپور منعکسوي چې ويلي يې و په افغانستان کې د هزاره وګړو حالت نور هم خراب شوی دی.
د دې رسنۍ له راپور سره سم، اوس مهال دا نتيجه نشي اخيستل کېدلای چې په افغانستان کې ټول مېشت هزاره وګړي نړيوال ملاتړ ته اړتيا لري، خو د جنسيت او په هغه سيمه کې چيرته چې داعش بريدونه کوي د ژوند په شمول، د پناه غوښتونکي شرايطو ته پام کېږي.
هلسينکي ټايمز ليکلي، چې په فنلینډ کې افغان ښځو او نجونو ته د پناه ورکولو تصميم يو مثبت ګام دی، خو کولای شي چې د غير قانوني کډوالۍ او د ښځو او نجونو د استثمار لامل شي.
کېدلای شي چې کورنۍ خپلې ښځينه غړې په فنلینډ کې د پناه غوښتنې لپاره په خطرناکو سفرونو روانې کړې چې کېدلای شي هغوی ته جدي ګوښونه پېښ کړي.
تر دې وړاندې ډنمارک او سويډن هم ويلي و چې د افغانستان ښځو ته يوازې د هغوی د جنسيت له وجې پناه ورکوي.
د بشري حقونو څار د دې اقدام هرکلی کړی او ويلي يې دي چې دا تصميم بايد د ټولو هيوادونو لپاره يوه الګو وي.
