اطلاعات روز: د طالبانو د رییس الوزرا د اقتصادي مرستيال دفتر د افغانستان د اقتصادي وضعيت په اړه د نړيوال بانک د وروستي راپور هرکلی کړی دی.
دې دفتر نن (شنبه، ۸ د سلواغې) په يوه اعلاميه کې ويلي، چې د نړيوال بانک په راپور کې «مثبت او پر عيني واقعيتونو ولاړ» نکات ياد شوي دي.
نړيوال بانک د افغانستان د اقتصادي وضعيت په اړه په خپل تازه راپور کې د انفلاسيون د کمښت او صادراتو د زياتېدو خبر ورکړی او ويلي يې دي چې کلنی انفلانسیون د ۲۰۲۲ کال په جولای کې له ۱۸.۳ څخه د همدې کال په نوامبر مياشتې کې ۹.۱ سلنې ته راکښته شوی دی.
په دې راپور کې راغلي چې افغانستان د ۲۰۲۲ کال له جنورۍ څخه تر نوامبر مياشتې پوري د ۱.۷ ميليارد ډالرو په اندازه توکي صادر کړي دي.
د عبدالغني برادر دفتر د نړيوال بانک راپور «د افغانستان د واقعي ودې او اقتصادي حرکت په اړه روښانه انځور» ګڼي او زیاتوي چې په دې راپور کې راغي چې د خوراکي او نفتي موادو بيې را لوېدلي، د خارجي اسعارو په وړاندې د افغانيو ارزښت ثابت پاتې شوی او په صادراتو کې د پام وړ زياتوالی راغلی دی.
دې دفتر زياته کړې، چې که په بانکي سکټور کې شته بنديزونه لېرې شي او د افغانستان کنګل شوې پانګه ازاده شي، اقتصادي وضعيت به تر دې نور هم ښه شي.
د طالبانو د لومړي وزير دفتر له نړيوالو سازمانونو غوښتي چې د افغانستان په اړه دي نړۍ ته د هغو «پرمختګونو» يادونه وکړي چې په افغانستان په ځانګړې توګه په اقتصادي برخه کې راغلي.
د نړيوال بانک تازه راپور چې ظاهرا د طالبانو تر کنټرول لاندې افغانستان کې حالت مطلوب ښيي، په داسې حال کې خپور شوی چې يو څه وخت وړاندې د ملګرو ملتونو د بشردوستانه مرستو د همغږۍ دفتر (اوچا) اعلان کړی و چې په روان ميلادي کال کې ۲۸.۳ ميليون خلک په افغانستان کې مرستو ته اړتيا لري.
تر يوې مياشې په کم وخت کې تر ۱۲۰ زيات خلک د سړې هوا له امله مړه شوي دي. سږ کال ژمی د سون توکو بيې لوړې شوي او د نړيوالو سازمانونو له راپور سره سم، د افغانستان تر ۷۰ سلنه ډېر وګړي سون توکو ته لاسرسی نه لري.
