اطلاعات روز: د طالبانو ویاند ذبیح الله مجاهد افغانستان کې د ښځو او نجونو د کار او زده کړې د منع په اړه د ملګرو ملتونو د امنیت شورا اندېښنو ته په غبرګون کې ویلي، چې دغه ډله نشي کولای هېواد کې غیر شرعي اقداماتو ته اجازه ورکړي.
د ملګرو ملتونو د امنيت شورا ۱۱ غړو په يوه ګډه اعلاميه کې «په افغانستان کې د ښځو او نجونو د بحراني» وضعيت په اړه انديښنه څرګنده کړې او له طالبانو يې غوښتي چې «ژر» دې د ښځو او نجونو په وړاندې ټول «ظالمانه اقدامات» لغوه کړي.
د طالبانو وياند نن (شنبه، ۲۴ د مرغومي) ويلي، چې د طالبانو حکومت د امنيت شورا اندېښنه درک کوي؛ خو هڅه کوي چې ټولې چارې د شريعت په رڼا کې تنظيم کړي.
مجاهد ويلي، چې طالبان د مسووليت د احساس له مخې چې « د دين او خپلو خلکو په وړاندې يې لري، نشي کولای په هيواد کې غير شرعي اقداماتو ته اجازه ورکړي.»
ده په پرلپسې ټویټونو کې ليکلي: «نړیوالو سازمانونو او هېوادونو ته په کار ده چې زموږ د هېواد حالات او د ملت دیني غوښتنې درک کړي او نړیوال بشري موضوعات او انساني مرستې تر سیاسي موضوعاتو پورې ونه تړي.»
د طالبانو وياند ويلي، چې دا ډله په هره برخه کې له ديني اصولو او د افغانستان له ارزښتونو سره سم همکارۍ ته تياره ده.
طالبانو واک ته تر رسېدو وروسته لومړی د نجونو پر وړاندې د ښوونځيو دروازې وتړلې، وروسته يې نجونې پوهنتون ته له تللو منع کړې او د هغه پسې یې په غير دولتي بنسټونو کې د ښځو پر کار هم بنديز ولګاوه.
د طالبانو دې اقداماتو نړيوال غبرګونونه له ځان سره درلودل.
په دې وروستیو کې د ملګرو ملتونو د امنيت شورا ۱۱ غړو له طالبانو په خپلو تازه څرګندونو کې له طالبانو غوښتي و، چې د ښځو او نجونو په وړاندې دي ظالمانه اقدامات لغوه کړي، له امنيت شورا سره دې خپلو کړو ژمنو ته ژمن پاتې شي او د ښځو او نجونو د حقونو درناوی دې وکړي.
هغوی په خپله ګډه اعلاميه کې ويلي و، چې په بشري عملياتو کې د ښځو رول محوري او حياتي دی، ځکه دوی ځانګړی تخصص لري او هغو ټولنو ته لاسرسی لري چې د دوی نارينه همکاران يې ورته نه لري.
د ملګرو ملتونو د امنيت شورا ۱۱ غړو ويلي و، چې د مرستې رسولو په پروسه کې د ښځو له بشپړې ونډې پرته، غير دولتي سازمانونه نشي کولای چې د ښځو او نجونو په شمول اړمنو وګړو ته خدمات وړاندې کړي. هغوی ټينګار کړی دی چې بشرپالي فعالان بايد له جنسيتي توپير پرته بشپړ او بې خنډه لاسرسی ولري.
