اطلاعات روز: د ناروې د کډوالو شورا عمومي منشي يان ایګلنډ افغانستان ته د خپل سفر په پای کې ويلي، چې تر څو د دې بنسټ ښځينه کارکوونکو ته د کار کولو اجازه ورنه کړل شي، ميليونونه وګړي به له مرستو پاتې وي.
نوموړي نن (شنبه، ۲۴ د مرغومي) پرلپسې ټويټونو کې ويلي چې له کابله وتلی دی.
يان ایګلنډ کابل ته پر دې موخه راغلی و، ترڅو طالبان قانع کړي چې په غير دولتي بنسټونو کې د ښځو پر کار بنديز ليرې کړي، نوموړي ليکلي: «په ډک زړه افغانستان پرېږدم. کله چې له کابله ووتلم د هوا درجه منفي ۲۰ سانټي ګریده وه. تر څو چې بيرته موږ ته اجازه راکول کېږي چې له ښځو سره يو ځای او د هغوی په وسيله کار وکړو، تر هغه وخته به ميليونونه وګړي له مرستو پاتې وي.»
يان ایګلنډ وايي، چې د ښځو پر کار د بنديز فرمان له کندهاره ورکړل شوی دی او ټاکل شوې وه چې دې ولايت ته سفر وکړي. تمه وه چې د چهارشنبې په ورځ کندهار ته ولاړ شي، خو د پنجشنبې په ورځ يې اعلان وکړ چې الوتنه يې ځنډيدلې ده.
دی زیاتوي، چې د ښځو د بيرته کار پېلولو لپاره د طالبانو نوي فرمان ته اړتيا ده.
د ناروې د کډوالو شورا او ځينو نورو سازمانونو په افغانستان کې خپل فعاليتونه په غير دولتي بنسټونو کې د ښځو پر کار بنديز ته په غبرګون کې درولي دي.
د ملګرو ملتونو د بشري مرستو د همغږۍ دفتر (اوچا) وايي چې د ښځينه مرستندويانو پر کار بنديز د مرستو د وېش بهير سخت اغېزمن کړی دی.
