اطلاعات روز: د طالبانو وياند ذبيح الله مجاهد وايي، چې په افغانستان کې په غير دولتي داخلي او بهرنيو سازمانونو کې د ښځو پر کار د بنديز فرمان په ملګرو ملتونو هم تطبيقېږي.
نموړي له بي بي سي سره په خبرو کې ويلي چې دا فرمان د ښځو د «عزت او عفت د خونديتوب» لپاره ورکړل شوی دی.
مجاهد ويلي چې د طالبانو حکومت دې پايلې ته رسېدلی چې ښځې بايد په هيڅ صورت هم په موسېسو کې کار ونه کړي. «ځکه دا موسېسې د امارت تر کنټرول لاندې نه دي، د ښځو لپاره پکې خطر زيات دی او موږ ته هم خطرناک راپورونه را رسېدلي دي.»
نوموړي په غير دولتي بنسټونو کې د ښځو کار کول د غلا په څېر ګڼلی او د دې پوښتنې په ځواب کې چې هغه ښځې به څه کوي چې د کور يوازينۍ ډوډۍ ګټونکې دي، ويلي: «څوک چې دا استدلال کوي چې زه غلا کوم ځکه ماشومانو ته مې ډوډۍ ګټم، موږ نه شو کولای چې د غلا اجازه ورکړو.»
طالبانو په دې وروستيو کې د ښځو پر زده کړو له بنديز سره – سره پر غير دولتي بنسټونو کې د هغوی پر کار کولو هم بنديز لګولی.
دا بنسټونه اوس مهال د مرستې رسولو په چارو بوخت دي. د طالبانو دې دوو وروستيو پرېکړو پراخ نړيوال غبرګونونه را پارولي دي.
