اطلاعات روز: د ملګرو ملتونو امنيت شورا په غير دولتي بنسټونو کې د ښځو د کار بنديز ته په غبرګون کې ويلي، چې د طالبانو دا پرېکړه به افغانستان کې د بشري مرستو بهير اغېزمن کړي.
د دې شورا غړو تېره شپه (سېشنبه، ۶ د مرغومي) په يوه بیانیه کې د طالبانو له لوري د ښځو پر زده کړو د بنديز په تړاو هم ژوره اندېښنه ښودلې.
دوی يو ځل بيا په افغانستان کې د ښځو او نجونو د بشپړ، برابر او معنادار ګډون غوښتنه کړې او ويلي يې دي چې طالبان دي ژر تر ژره ښوونځي پرانيزي او ژر دې «دا سياستونه او چلندونه بدل کړي چې بشري حقونه او اساسي ازادۍ نقضوي».
له دې سره – سره، د ملګرو ملتونو د امنيت شورا غړو ويلي چې د هغو راپورونو په تړاو اندېښمن دي چې طالبان د غير دولتي سازمانونو او نړيوالو سازمانونو ښځينه کارمندانې له کار ځايونو راګرزوي.
د دوی په وینا دا پرېکړه به د ملګرو ملتونو په ګډون په هېواد کې د بشري مرستو، د مرستو د لېږلو او روغتیايي کارونو په برخه کې د پام وړ او سمدستي اغېز وکړي.
د ملګرو ملتونو امنيت شورا ويلي، چې د طالبانو بنديزونه د دې ډلې له هغو ژمنو سره چې د افغانستان د خلکو په تړاو يې کړي د نړيوالې ټولنې له هيلو سره په تضاد کې دي.
امنيت شورا په افغانستان کې د ملګرو ملتونو د سرمنشي د ځانګړي استازي له ماموريت (يوناما) څخه خپل ملاتړ اعلان کړی دی.
دې شورا په افغانستان کې له اړونده ټولو لوبغاړو او سياسي اړخونو سره دوامدار تعامل مهم ګڼلی دی.
