اطلاعات روز: د ملګرو ملتونو د وګړو صندوق اجرايوي مديرې ناتاليا کانم په افغانستان کې د ښځو پر زده کړو او په بشري سازمانونو کې د هغوی پر کار بنديز په کلکو ټکو غندلی دی.
هغې په يوه بیانیه کې ويلي، چې د طالبانو دا فرمانونه بشري نړيوال حقونو نقضوي او د ښځو هغه حقونه سلبوي چې هغوی يې د يوه انسان په توګه لري.
ناتاليا کانم ويلي: «طالبان د زده کړو له حق څخه ښځې او نجونې محروموي او په دې توګه د هيواد په پرمختګ، اقتصادي ودې او ثبات کې د نيم نفوس ونډه له پامه غورځوي.»
دې همدا راز ټينګار کړی چې ښځې بشري بحران ته په اغېزناکه توګه ځواب ورکولای شي.
د ملګرو ملتونو د وګړو صندوق اجرايوي مديرې زياته کړې چې د افغانستان په لېرې پرتو سيمو کې هره مياشت ۲۴ زره ښځې زېږون کوي او د خوندي زېږون لپاره روغتيايي خدماتو ته اړتيا لري.
دې له طالبانو غوښتي چې ښځو او نجونو ته اجازه ورکړي چې بيرته مکتبونو ته ولاړې شي او همدا راز په غير دولتي سازمانونو کې بوختو ښځو ته اجازه ورکړي چې د افغانستان د ميليونونو سختو اړمنو خلکو د ژغورنې کار ته دوام ورکړي.
طالبانو په دې وروستيو کې د ښځو د تحصيل تر څنګ، په غير دولتي بنسټونو کې د ښځو پر کار هم بنديز لګولی دی. تر دې وړاندې يې هغه ښځې هم پر کورو کېنولي چې په دولتي ادارو کې يې کار کاوه.
د طالبانو دې وروستيو دوو پرېکړو نړيوال غبرګونونه را پارولي دي. د اسلامي هيوادونو په شمول نورو هيوادونو دا اقدامات غندلي دي.
