اطلاعات روز: کندهار کې ځایي سرچینې وایي، چې د تجربوي لېسې یوه تنکي ځوان زده کوونکي ځان زندۍ کړی او خپل ژوند ته یې د پای ټکی ایښی دی.
یوې سرچینې چې نه یې غوښتل نوم یې خپور شي اطلاعات روز ته وویل، دغه زده کوونکی شفیق الله مدیون نومېده او نږدې ۱۶ کاله عمر یې درلود.
د سرچينې په وینا، شفيق الله د کندهار ښار د تجربوي لېسې يو له ممتازو زده کوونکو څخه و او نن (چهارشنبه، ۳۰ د لیندۍ) غرمه مهال يې د دغه ښار د څلورمې ناحيه اړوند د خپل کور په تشناب کې ځان ځړولى دى.
سرچينه زیاتوي، چې دغه ١٦ کلن زده کوونکي خپلو ټولو ملګرو سره خدای پاماني کړې او له هغوى يې بښنه غوښتې ده. سرچينې دا هم وویل، چې شفيق الله د خپلې کورنۍ له ټولو غړو خدای پاماني اخیستې او له ځان وژنې مخکې يې د خپلې مور لاسونه ښکل کړي دي.
دغه سرچينه وايي، شفيق الله د کندهار ښار د برښناکوټ پله سره دوکان درلود او کورنۍ يې د ځان وژنې د لامل په اړه څه نه دي ويلي.
په کندهار ولایت کې سیمه ییزو طالبانو هم د دغه ۱۶ کلن تنکي ځوان وژل کېدل تایید کړي، خو جزیات یې نه دي ورکړي.
دا په داسې حال کې ده، چې په دې وروستيو کې د کندهار په ګډون د هېواد په بېلابېلو ولايتونو کې د ځوانانو د ځان وژنې کچه لوړه شوې ده. فقر، بې کاري او رواني ستونزې په هېواد کې د ځوانانو د ځان وژنې اصلي لاملونه بلل کېږي.
